Коень коряс умарьковсто эрьва тонавтомань од иеденть икеле тонавтыцятне пуромкшныть покш промксос топавтозь тевде ды стакачитнеде кортнеме. Истя, те иестэнть эрзянь ды мокшонь келень тонавтыцятне пурнавкшность 23-це чистэ республикань промксос ды 25-це чистэ Саран ошонь тонавтыцянь промксос.

Республикань промксось ютась М. Е. Евсевьев лемсэ филологиянь факультетэнь педагогикань институтсо. Анокстызь промксонть Мордовия Республикань образованиянь министерствась, Мордовия Республикань образованиянь институтось ды М. Е. Евсевьев лемсэ педагогикань институтось. Лембе вал марто весе пурнавозтненень пшкадсть
Н. В. Салмова – МР-нь образованиянь министерствань прявт специалистэсь-важодицясь, О. И. Налдеева – М. Е. Евсевьев лемсэ педагогикань институтонь филологиянь наукань докторось, тиринь келень ды литературань кафедрань прявтось, Е. Н. Ломшина – философиянь наукань кандидатось, доцентэсь, Н. П. Огарёв лемсэ университетэнь финнэнь-угрань культурань лабораториянь прявтось ды О. В. Кочеваткина – филологиянь наукань кандидатось, доцентэсь, МР-нь образованиянь институтонь гуманитарной образованиянь кафедрань прявтось.

Теде мейле вал максозель тонавтыцятненень. Васенцекс кортась
В. Ф. Рогожина – Н. П. Огарёв лемсэ университетэнь эрзянь ды мокшонь кельтнень кафедрань филологиянь наукань кандидатось, доцентэсь. Сонзэ яволявтоманть лемезэ «Преемственность преподавания мордовских языков в общеобразовательных школах и вузах Республики Мордовия». Валентина Фёдоровна пачтясь: те тонавтома иестэнть саезь эрзянь ды мокшонь кельтне кармить ветявомо университетэнь весе институттнэсэ ды факультеттнэсэ.

М. П. Сыркина Саран ошось 2-це тонавтома кудонь эрзянь келень тонавтыцясь, Мордовия Республикань эрзянь ды мокшонь кельтнень экзаментнэнь максоманть коряс предметной комиссиянь прявтось кортась седе, кода те иестэ 9-це пурнавксонь (классонь) тонавтницятне максызь экзаменэст эрзянь ды мокшонь кельтнень ды литературатнень коряс. Целанек весе экзаменэст максызь парсте, ансяк весень эйстэ удало кадовсть Ицялонь буень Ламбаське велень эйкакштнэ.

Теде башка промкссонть кортасть Н. А. Чернышова – Саран ошонь
43-це лицеень мокшонь келень тонавтыцясь («Современный урок и мультимедийные средства. Из опыта использования IT-технологий в контексте освоения стандартов нового поколения»), А. А. Данильчев – Саран ошонь 26-це лицеень эрзянь келень тонавтыцясь («Тиринь масторонтень вечкемась тонавтомань ёнксонть вельде эрзянь келень тонавкстнэсэ»),
О. В. Михеева – Саран ошонь 39-це тонавтома кудонь мокшонь келень тонавтыцясь («Формирование коммуникативной компетенции на уроках мокшанского языка»), Н. Н. Чернова – Сыре Шайговань буень Сыре Теризморгань тонавтома кудонь мокшонь ды рузонь кельтнень тонавтыцясь («Использование метода проектов на уроках русского, родного языка и литературы: из опыта работы»), М. Н. Миронова – Саран ошонь
24-це тонавтома кудонь мокшонь ды рузонь кельтнень тонавтыцясь («Здоровьесберегающие технологии на уроках мокшанского и русского языков») ды В. А. Сидяева – Саран ошонь 28-це тонавтома кудонь мокшонь келень тонавтыцясь («Кабинет родного языка как место работы школы по созданию языковой среды как фактора сохранения и развития национальной культуры и средства воспитания национального самосознания обучающихся»). Кенярдовты, меельце шкасто промкстнэсэ кортамотне ветявить эрзянь ды мокшонь кельтнесэ. Кемтяно, лия промкссояк тонавтыцятне седе ламо кармить кортамо эсь тиринь кельсэ.

Истя, эрзякс ды мокшокс ветявсь Саран ошонь тонавтыцятнень промксоськак, кона ютась 19-це гимназиясо. Весе кортамотне сюлмазельть тонавтницятнень духовно-нравтственной кастоманть марто. Эсест мелест-арсемаст тонавтомань тевтнень коряс ёвтызь А. А. Учеваткин – 4-це лицень эрзянь келень тонавтыцясь, воспитательной важодемань коряс прявтонь полавтыцясь, И. Г. Зубарева – 26-це лицеень эрзянь келень тонатыцясь,
М. Н. Миронова – 24-це тонавтома кудонь мокшонь ды рузонь кельтнень тонавтыця, Н. А. Чернышова – Саран ошонь 43-це лицеень мокшонь келень тонавтыцясь ды лиятне. Паро валт весень туртов ёвтась 19-це гимназиянь прявтось З. И. Акимова. Кортась мокшокс. Кортась парсте. Ёвтнесь, кода аволь умок якась Коми Республикав, косо ютась РФ-нь АФУНонь покш промс ды косо коминь келень тонавтыцятне невтизь эсест меельце важодемаст тонавтомань тевсэнть – электронной эрьва кодат лездамопельтнень, методикань коряс важодематнень,  ды минек республикань тонавтыцятнененьгак седеяк эряви кемекстамс эсь содамочитнень. Теде башка весень туртов пшкадсть Н. В. Салмова –
МР-нь образованиянь министерствань прявт специалистэсь-важодицясь,
М. М. Вельмякина – Саран ошонь образованиянь управлениянь этнокультурань куронь прявтось.

Кортасть стакачитнедеяк. Истя, те иестэнть саезь Саран ошонь малав весе тонавтома кудотне 2-це пурнавкссо (классо) ютыть 5 чинь тонавтнемань таргос, секскак кельтнень коряс тонавтома часстнэ киртявсть кавто чассто вейке часос. Келя, вейке часось карми прявт, омбоцесь жо аволь уроконь коряс важодема. Пачтясть, талнома а карми, секс мекс весе часстнэ кадовить апак полавто. Ёвтазельть тонавтома кудотне, косо кармить ветявомо семинарт: 6-це, 33-це, 43-це ды Ялгань тонавтома кудотне.

Меельце пелев аравтозельть истят путовкст:

1. Седе виевстэ домкалгавтомс эрзянь ды мокшонь кельтнень тонавтыцятнень содамочист тонавтомань методиканть коряс.

2. Поладомс важодеманть од форматнень, технологиятнень ды тонавтомань методтнэнь тевс нолдазь.

3. Седе ламо важодемс ёроков эйкакштнэнь марто.

4. Поладомс важодеманть экспериментэнь, проектэнь ды исследованиянь важодеманть лувсо эйкакштнэнь марто.

5. Седе сеедьстэ  путомс тонавтомань юрс эрзятнень ды мокшотнень историядост ды культурадост лездамопельтнень.