Эрямонзо перть киштематнень марто

Н.П.Огарёв лемсэ МГУ-со Наталья Васильевна Атитановань лемезэ содавикс малав эрьвантень. Сон ламо иень перть важоди Национальной культурань институтсо.  Вете иеть – университетэнь Культурань кудонь прявтокс. Н.В.Атитанова аволь ансяк тонавты студентт, сон пурны регионъютконь ды раськеютконь эрьва кодат фестивальть – морамонь, киштемань, театрань. Саемга, «Новая Лиса» неень шкань хореографиянь Весероссиянь фестивалесь-пелькстамось теевсь пек содавиксэкс ды вечкевиксэкс. Коллективензэ марто ютавты «Сударушка», «Мисс Университета», «Звездопад» вузонь конкурстнэнь. Наталья Васильевнань весе эрямозо сюлмавозь киштематнень марто. Сон – национальной хореографиянь кафедрань доцент, «AR балет» неень шкань киштемань коллективень художественной руководитель. Путсь хореографиянь 50 постановкат, балетэнь 6 спектаклят. Течи ули меленек содавтомс тынк те ёроков, превей, мазый аванть марто, кона чачсь Саранскойсэ, а вана весе ундоксонзо – ветькень (чуважонь).

Василий Архипович ды Вера Тарасовна Атитановтне чачсть Чувашиянь Батыревской районсо. Теевсть содавиксэкс Казаньсэ, зярдо ульнесть студентэкс. Вузонь прядомадо мейле сынст кучизь важодеме Саранскоев. Меревсь кочкамс лия ошкак, ансяк тесэ одтнэнь туртов алтасть максомс эрямо тарка.

– Тетям важодсь автомобилень отраслясо инженерэкс, авам – врач-лаборант. Семиясонок, мондень башка, ули Елена патям, кона, кода авамгак, врач, анестезиолог. Сон – кеме обуця, превей, весенень лездыця. Бути улить кодаткак стакачить, свал муи виде ки ды лезды. Пек вадря, зярдо вакссот ули истямо малавикс ломань. Сюкпря сонензэ. Минь чачинек Саранскойсэ. Эрьва кизэнь каникулатнестэ ардтнинек тетянь-авань тиринь ёнксов, Чувашияв. Ветькень келенть а содаса. Тесэ, ошсо, кувать мартонок эрясь тетянь ёндо бабам, Евдокия Ивановна. Сон пек вечксь минек, ламо шка алтась тенек. Бабам школав эзь яксе. Тень лангс апак вано, ламо содыль, ламо маштыль. Ледстнян, патянь марто яла тонавтынек сонзэ букватнес, ловномо, налксинек мартонзо: сон – тонавтниця, минь – тонавтыцят. Бабам лиссь мирденень 1917 иестэ. Сон ёвтнесь, кода мирдензэ марто сыргасть Ульяновскоев вейсэнь фотографиянь тееме, кода жо, од семия! Недлянь перть ардсть тов, зняро жо – мекев. Бабань эрямозо аволь шождаль. Вейксэ эйкакштнень эйстэ кадовсть ансяк колмо, лиятне кулость. Сынст семияст яволявтызь «кулакокс», панизь Сибирев. Тосо мирдезэ чавовсь. Мейле омбоцеде лиссь мирденень. Тетям чачсь омбоце мирденть пельде. Бабам кулось 99 иесэ. Те шкас ледстнетяно сонзэ прякатнень ды пачалксетнень танстест.

– Наталья Васильевна, эрсетядо-арась тынь тетянк-аванк тиринь ёнкссо? Кодат койть-кирдат тосо ванстовсть?

– Минь тов ардтнетяно Троицясто. Тетянь велезэ – Сигачи. Сон явозь кавтов, тосо ламо пингень перть эрить эрзят ды ветькеть. Эрить покш ояксчисэ. Тейнить вейсэнь семият, тешкстыть кенярксчить. Тосо пек учить, зярдо сы тенст морамо минек «Умарина» ансамблясь. Вешить морамонь дискт, энялдыть кучомс тенст морыцят. Сигачисэ келейстэ тешкстыть Троицянть. Наряжить килей, ютыть велева, весе морыть, наряжить килей тарадсо кудотнень. Эйкакшпингстэ саезь те весе ашти мельсэнь. Авань велесь – Первомайское. Тосо тешкстасть велень ульцянь кенярксчить. Ушосо пурныльть стольть, эрьвась бажась анокстамс мезеяк тантей, каванямс лиятнень. Весе морыльть, киштильть. Истя жо ледстнян, кода тешкстасть свадьбатнень. Сёрмадстомась (роспись) ютыль чокшнень 9 чассто, инжетне пурнавильть чокшнень 11 чассто! Мекс истя? Васня андылизь-симдилизь кудоютконь ракшатнень, мейле валскес киштить-морыть ды… важодеме. Ветькетне ваныльть мель покштнень ды сыретнень. Од ломантне ды сыретне ве столь экшс зярдояк а озыльть.

– Наталья Васильевна, тынк ули ветькень раськень оршамопеленк?

– Ванстовсь бабань костюмозо. Улить васол патянь оршамост. Ансяк весе сынь эрьва чинь якамонь. Эзть ванстово сетне, конатнень оршнесть кенярксчистэ. Мейсэ сюпав ды мазый ветькень костюмось? Эйсэнзэ улить сиянь пряс путомка, сиянь ярмакт, эли монисто, кона каяви лавтов ланга ды мештева. Раскулачиваниянь шкатнестэ ламось саезель-нельгезель, эзь ванстово. Содан истя жо, неень шкань ветькень велетнесэ аватне тейнить, вельмевтить кезэрень оршамотнень. Ветькень аватне кедьчелькевть. Сынь маштыть кодамо мазый ковёрт, носкат, варьгат ды лият мезть. Чувашиясо эрить ламо малавиксэнек. Весень марто кирдтяно кеме сюлмот. Тетям-авам эйсэнек тонавтсть: илинк стувто ундоксонк.

– Наталья Васильевна, эрямонк сюлмазь киштематнень марто. Ёвтнеде, мейстэ весе ушодовсь?

– Киштематнень марто сюлмавинь аволь кода ламот – вишка шкасто, 6-це классо тонавтнемстэ. Миненек сась Ю.И.Гармашова педагогось, сон кочкась тейтернеть ды цёрынеть. Васня эзинь моле. Мейле, лиятнень лангс ванозь, мелем чачсь. Сыргинь монгак. А ёвтавияк, кода сеске тусь мелезэнь! Прок од эрямо ушодовсь. Ялгань марто карминек яксеме «Строитель» Культурань кудонть юрсо хореографиянь коллективев. Мартонок важодсь И.Н.Федюшкина од специалистэсь. Сон пурнась «Пульс» киштемань студия. Саимизь тов. Мейле ялгань марто киштинек «Вдохновение» дуэтсэ. Те шкас мельсэнь кирдян весе эскелькстнэнь. Репертуарось покшоль, ульнесть пек ламо концертт. Косо ансяк эзинек киште! Ошонь культурань кудотнесэ, парксо, истя жо колхозсо, паксясо, строявиця зданиятнень вакссо… Те ульнесь виев практика. Бажинек туемс весень мельс. 26 № школасонок минтеменек эзь ютне вейкеяк кенярксчи.

Школань прядомадо мейле од тейтересь арсезевсь, ков молемс тонавтнеме. Сон весе седейсэ бажась Ленинградонь культурань институтов. Ансяк семиясо мерсть: мезекс молят ков-бути лия ошов, бути тесэяк ули университет ды пединститут. Тетязо-авазо парсте содыльть, кода эрямс ды тонавтнемс лия ошсо, кодат стакачить сави печтямс. Наталья эзь карма молеме мелест каршо ды тусь тонавтнеме М.Е.Евсевьев лемсэ МГПИ-нь педагогической факультетэв начальной классонь тонавтыцякс.

1991 иестэ Н.П.Огарёв лемсэ МГУ-со панжовсь национальной культурань факультетэсь. Натальянь мирдезэ Алексей мерсь, мольть тов. Сон парсте несь, кода вечкевиксэнзэ туртов а сатныть киштематне. Наталья Васильевна ушодсь тонавтнеме «хореографиянь искусства» специальностенть коряс. Васенце образованиясь лездась тензэ эрьва мейсэ. 4-це курссо тонавтнемстэ сонсь уш тонавтсь 1-це курсонь студенттнэнь.  Мейле 20 иень перть важодсь национальной хореографиянь кафедрасо. 2000 иестэ саезь – философиянь наукань кандидат. Диссертациязо алтазь хореографиясо смустень вешнемантень. Сон – МР-нь культурань заслуженной роботник.

Наталья Атитановань эрямосо сехте питнеесь – те семиязо: Александра ды Мария тейтерензэ. Истя жо вечкевикс важодемазо ды хореографиянь искусствась, конань сон полады тонавтнеме ды тонавтомо.

Татьяна Маторкина