Пенза ёнксонь Бессоновской райононь Пазялго велесэ эрьва иень Тровицясто тешкстыть Эрзянь покшчи. Ламоксть савкшнось марсемс, кода Пазялгосо ютавтови сон. Эрьвась шнась, паро мельсэ ёвтнесь, ледстнесь, тердсь молемс. Ды вана понгинек тозонь васенцеде. Тедеде кенярксчись пурназель кавксоцеде. Сонзэ прявт ютавтыцязо – Пензань эрзянь ды мокшонь ошонь национально-культурной автономиясь. Истя жо Пенза областень Правительствась, Бессоновской райононь администрациясь.

Пазялго веленть куншкасо покшчинть туртов уш зярыя иеде икеле стявтозь-теезь башка тарка: паро сцена, каршонзо – ваныцятнень туртов озамо таркат, модань мар, козо ладяви штатол. Истя жо тесэ ладязь покш ды сэрей нурямот. Тесэ покштнеяк марясть эсь пряст эйкакшокс, зярдо нурясть.

Панжозельть эрьва кодат выставкат: ярсамопелень, чувтосто керсемань, декоративно-прикладной творчествань. Пазялгонь аватне каванясть эрзянь ярсамопельде: пачалкседе, чевгелень прякадо, кашадо, пуштазь алдо, пангодо, капстадо, куслядо, симдсть алкуксонь позадо. Сынст перька, содазь, чарасть ламо инжеть. Лия ёно пидесть весень туртов сывель ям ды каша. Андсть весень.

Весе цёратне ды цёрынетне ульнесть «Тюштянь тюремат» таркасонть. Тесэ аволь ансяк налксесть, тесэ алкукс пелькстасть ды верьс бороцясть вейкень-вейкень марто. Тесэ леднесть налсто, ёртнесть узереть, пеельть ды копьят, бороцясть. Изницятне казевсть паро казнесэ.

Сеске эряви меремс, те велесэнть покшчинтень пурнавкшныть ламо ломанть. Шабра велестэ, районсто, лия ошсто. Нейгак сакшность Самарасто, Тольяттистэ, Московсто, нама, Мордовиястояк. Пензань эрицятнень туртов явсть башка автобуст, конат питневтеме ускизь сынст Пазялгов.

Коень коряс, кирвазтезель штатол, ёвтазельть Инешкипазонтень ознома валтнэ. Тень топавтызь А.Суркин, А.Данильчев ды Т.Мокшанова. Ломантне кундасть кедте кедьс ды ютасть вейке кирькссэ. Весе вейсэ морасть «Вирев молян» моронть. Теке мерят, Раськень озкс, ансяк Пензань мода лангсо.

Весе инжетнень туртов лембе валонь ёвтамо сакшность Пенза областень Правительствань председателень полавтыцясь В.И.Трохин, Бессоновской райононь прявтось В.Е.Демичев, Пенза областень Од ломанень кудонь прявтось, законодательной собраниянь депутатось О.А.Куроедов ды лият.

– Минек Сура ёнкссонть эрить малав 100 эрьва кодат раськеть. Тесэ сюпавдояк сюпав культурась ды койтне-кирдатне. Мельспаро, зярдо неть весе койтне ванстовить ды вельмевтевить, кода, саемга, тесэ. Эрзятне – маштыть инжень вастомо, сынь важодемань вечкицят ды паронь арсиця ломанть. Арсян тенк кеме шумбрачи ды уцяска! – кортась В.И.Трохин.

Пенза областень Губернаторонть пельде Благодарностьсэ сон казинзе сетнень, кить тейсть покш путовкс раськень тевтнень коряс: К.П.Барашкинань, И.А.Любавинэнь, Т.С.Микинань, О.Н.Пушкарёвань, А.Г.Суркинэнь, Г.Г.Самылкинэнь ды лиятнень.

Покш концертэнть ушодызе Пазялгонь «Чевгелина» ансамблясь, конань ветицязо Понятова Людмила Николаевна. Ансамблянть эйстэ миненек ёвтнесь морсицясь Татьяна Семёновна Микина.

– «Чевгелина» коллективенек од, сонензэ нилеце ие. Морсить 11 ломанть. Баянистэнек ава – Антонина Ивановна Малюкова. Сон ломанесь валдо, паро. Свал кази вадря ёжо минек ды весе ваныцятнень туртов. Морсетяно эрзянь кезэрень морот. Истя жо минськак ладсетяно. Течи самай моратано авторонь морот – «Чачома веле» ды «Чевгелина». Морсеме якатано эсенек областька. Аволь весть ульнинек Саранскойсэ. Репетициянок ютавтнетяно школасо, клубонок арась. Морсетяно покш мельсэ, весе тевенек кадсынек, чийтяно, – кортась Т.С.Микина. Те покшчинтень авась анокстась ведра поза!

Пазялгосо истя жо ули «Эрзяночка» эйкакшонь ансамбля. Сонензэ 30 иеть! Течияк морасть сцена лангсто. Эйкакштне полавтневить, сынст марто важодемась ялатеке поладови. Эрзянь келесь школасонть ветяви факультативень лувсо 5-8 класстнэсэ. Пазялгосо эрзянь келентень, культурантень явови башка мель. Эрьва ие чадыковсто келейстэ тешкстыть Эрзянь келень чинть, ютавтыть пелькстамот, казить изницятнень.

Кенярксчисэнть морасть «Тештине», «Ялгат», «Манине» ансамблятне. Сынсь невтсть «Мирденень лисема» ды «Эрзянь тамаша» номерт. Гайгсть частушкаткак. Ломантне лиснесть киштеме сцена икелев. Саранскойстэ якась «Мерема» фольклорной ансамблясь. Весе морыцятне казевсть.

– Монь койсэ, тедеде минек кенярксчись икеле иетнень коряс ютась седеяк парсте. Тей састь ламо ломанть. Эштёяк сыксэльть ды пелезевсть покш пиземеденть, конась, кода несынк, ютась веленть вакска. Тровицясто эрьвась бажи эсензэ тиринь велев, секскак аволь весе савсть. Тедеде муинек лездыцят-спонсорт. Явшинек ламо казнеть морыцятненень, пидицятненень-паницятненень, конкурссо изницятненень. Явшинек «Мон вечкса Пазялгонть» футболкат. Ней жо тердян эйсэнк июнень 26-це чистэ самс Пенза ёнксонь Шемышейской райононь Дёмкина велев. Тосо ули истямо тарка, конань лемезэ «Пуре латко».  Кезэрень шкане тосо ютавтовсть койть. Садо, мелезэнк туи! – кортась Пензань эрзянь ды мокшонь ошонь национально-культурной автономиянь прявтось Сергей Мальцев.

Пазялгосо Эрзянь покшчись весенень учовикс ды вечкевикс. Сыренек-однэк чинь перть аштесть пси чинть ало, кияк ковгак эзь оргоде, вансть концерт, ёвтасть вейкест-вейкест туртов лембе валт. Сы иестэ кенярксчинь анокстыцятне тагояк тердить весень пурнавомс вейс.

Татьяна Маторкина