«Палэзянось» пурнынзе вейс од ломантнень

 

21-24 сентября в Ижевске (Удмуртия) прошёл VI Международный финно-угорский фестиваль молодежной этнокультуры «Палэзян». В этом году фестиваль посетили и финно-угорские поэтэссы: Татьяна Шахова из Республики Коми, Вера Гордеева из Марий Эл и Алина Подгорнова из Мордовии. Подробнее о том, как это было, нам рассказывает член Союза писателей России, редактор отдела журнала «Сятко» Алина Подгорнова.

Сентябрянь 21-24-це читнестэ Удмуртиясо ютась «Палэзян» («Пизёл») финнэнь-угрань од ломанень этнокультурань фестивалесь. Сонзэ пингстэ мольсть мастер-класст, творческой вастовомат, Кругловой стольть, концертт, выставкат. Те покш фестивалентень Мордовиясто якасть Н.П.Огарёв лемсэ МГУ-нь ИНК-нь «Од варма» арт-театрась, «Кезэрень кой» народной моронь ансамблясь, «Васедема» киштемань коллективесь ды минек од авторось, РФ-нь писателень Союзонь членэсь, «Сятко» журналонь отделэнь редакторось Алина Подгорнова.

– Алина, ёвтнек тенек седе домкасто, мезе тосо ульнесь? Кить ды косто сакшность?

– Тедеде Удмуртиясо котоцеде ютась «Палэзян» этнокультурань фестивалесь. Тов икеле иетнестэ сакшность ансяк морыцят, тедеде тердсть сёрмадыцяткак. Эйстэст аволь ламольть: Коми Республикасто – Татьяна Шахова, Марий Эл Республикасто – Вера Гордеева, Мордовиясто – мон. Весе стихень сёрмадыцят.

– Кить ютавтыть-пурныть те тевенть?

– Фестиваленть ютавты Раськетнень ютксо Ялгаксчинь кудось, конанень лезды Культурань министерствась.

– Кодат вастовомат ульнесть ды мезде кортыде?

– Минь якинек удмуртонь газетань ды журналонь редакциява, кортнинек раськень печатенть тевтнеде-валтнэде, финнэнь-угрань кельтнес ды кельтнестэ ютавтомадонть. Якинек удмуртонь филологиянь факультетсэ тонавтницятнень марто вастовомас. Тосо домкасто ёвтнинек эсенек литературатнеде, седе пек – неень шканседенть, сонзэ изнявкстонзо ды стакачидензэ. Ульнинек «Ингож» («Небесная строка») од сёрмадыцянь вейсэнь пусмонь презентациясо. Тосо макссть вал миненекак. Ловнынек эрьвась эсь кельсэ  стихть. Экрансонть невтезель ютавтовксось.

Филологиянь факультетсэ вастовоманть ветясь Любовь Петровна Фёдорова, сон педагогикань наукань кандидат, удмуртонь филологиянь факультетэнь доцент. Любовь Петровна кенярдсь, мекс инжест ютксо весе тейтерть: наукань важодемасонзо сон ванны удмуртонь ды финнэнь-угрань лия раськетнень аваломанень поэзиянть. Секс макснесь тенек ламо кевкстемат: кие мезде сёрмады, мекс сёрмады, сёрмады а сёрмады вечкемадо, мейсэ, койсэнек, явови цёраломанень поэзиясь аваломаненсестэнть ды седе тов. Мон натой абунгадынь, кода сон содасынзе эрзянь, маринь, коминь литературатнень! Эйстэнек эрьванть марто кортамсто сон кевкстнесь минек республикань сёрмадыцятнеде, сон содасынзе лемест, соды, мезде сеть сёрмадсть. Эрзянь литературасо сонзэ абунгавтсь се, кода минек сказительницатне, сёрмас апак сода, арсесть-ладсесть эсь лайшемаст.

– Тон анокстыть доклад-кортамо, ёвтнек, мезде пачтясть лия ёнкссто сазь инжетне? Кода молить сынст тевтне литературанть коряс?

– Инжетне ёвтнесть од сёрмадыцятнень вейсэндявксто: Комисэяк, Марий Элсэяк сынь улить. Ёвтнесть книгань нолдамо тевденть. Комисэ иень трокс нолдтнить тиринь кельсэ пусмот ды пандыть кисэст гонорарт. Марий Элсэяк нолдавить пек ламо книгат маринь кельсэ. Минек та-кода аламо, монень маряви. Мелят весемезэ лиссть 57 (!) книгат. Эйстэст кавтотне эйкакшонь. Маритненьгак ули од сёрмадыцянь вейсэндявксост, конань зярыя иеде икеле пурнызь студентт. Улить вейсэнь зярыя пусмосткак.

Комисэ книгань нолдамось аламодо явови минекенть эйстэ. Тедеде, мерьсынек, тосо нолдыть рузонь кельсэ книгат, сы иестэ – коминь кельсэ. Эрси, сынст лиснить «кассетной» пусмот. Те зярдо саить колмошка сёрмадыцят ды вешкане нолдыть тенст пусмот. Мейле весенень вейсэ теить презентацият. Ды максыть кисэст гонорар. Коми Республикасо нолдтневить вейсэнь пусмоткак. Сынь вельть лездыть од сёрмадыцятненень кемезевемс эсь вийзэст. Теде башка, тосо ютавтневить раськень ламо покшчить. Мелем явовтызе «Коми книгась». Сёрмадыцятне ардтнить буетнева-велетнева ды ловныть ломантненень тиринь кельсэ сёрмадовкст. Мон марсинь, икеле шкане минек сёрмадыцятнеяк ардтнесть велетнева, ломантне содылизь сынст чамаст, марсилизь вайгелест. Ней ардтнемга киньгак арасть ярмакост…

– Алина, мезе тонь кецявтынзить тосо улемстэ?

– Кецявтымим, кодамо покш мель явить од ломантне культураст ды келест туртов. Чарькодеви, аволь весе. Мельзэнь пек тусь, кода важоди Ялгаксчинь кудось, кода ламо лезэв мероприятият ютавты. Алкуксонь мероприятият, аволь конёв лангсо. Вечкевсь удмуртонь од артыцянть Анна Образцовань «Кекшезь тешкст» васенце выставказо. Артовкстнэ теезь удмуртонь раськентень вечкема марто: эйсэст весе ломантне оршазь раськень оршамопельсэ. Ды кода мерсь ветицясь, эрьвасонть ули кекшезь удмуртонь раськень тешкс. Кода эрзятнень паляст лангсо викшневкстнэ, удмуртонь раськень тешкстнэ ульнесть ломаненть паспортонь таркас.

«Палэзян» фестивальс сазь морыцятнень марто саимизь «Лудорвай» архитектурань-этнографиянь музеев-заповедникев. Сон Ижевскойстэ аволь васоло. Те аволь музейгак – цела веле удмуртонь кезэрень кудо ды ули-паро марто. Пачкодинек курок, лисинек автобуссто, стинек чувтонь пекстазь ортатнень икелев, учотано. Я, вантано – тона ёндо ортанть алга эвкстасть чувтонь койме, кодамосо каштомсто кши таргсить. Мезе ней теема? 

Весе кармасть вейкест-вейкест кевкстнеме. Я, кие-бути чарькодсь: эряви путомс койменть лангс ярмашкеть. Юткозонок понгсть омбо масторонь туристт, сынь путсть евросо. Коймесь мекев ёмась ортатнень удалов, ансяк малав сеске лиссь мекев, лангсонзо – валдо-тюжа ведте пешксе покш цярка. 

Мезе теемс сонзэ марто, весе чарькодсть сеске. Цёратнень эйстэ кие-бути чамдызе кедьгиненть. Ортатне панжовсть. Икеленек стясть удмуртонь оршамопельсэ сисем ават. Сынь морасть шумбракстнемань моро, ды минь ютынек музеентень-заповедникентень. Покшолмазо – 691 кавонзазь метра. Мезе ансяк тосо арась! Икелень шкане тесэ ульнесть удмуртонь ды рузонь велеть. Ансяк таго-мекс ломантне тусть эрямо аламодо ве ёнов ды таркатне чамсть. Зярдо 1984-це иестэ кармасть вешнеме музеентень тарка, лоткасть тей. «Лудорвай» музеесь – те веле, косо кой-кона кудотне кадовкшность туезь эрицятнеде мейле, кой-конатнень ускизь лия велестэ. Лангозост ванозь, те вадрясто содави: эрьва велень кудось мейсэяк ды явови лиятнень эйстэ. Ули тесэ вармаведьгевесткак. Самай сонзэ ваксс васняяк минь лоткинек. Те вармаведьгевентень – 120 иеть. Сон ускозь тей лия велестэ. Азорозо тейсь те ведьгевенть 12 иеть. Чарькодеви, икеле неень шкань кондят кедьёнкст арасельть. Зярдо сон теевсь, азорось кармась сюпалгадомо, ули-парозо ламолгадсь. Самай сестэ кармасть кулактнень пансеме. Зярдо кармась содамо – паньсызь велестэнть, седеезэ эзь цидярдо. Кудораськезэ тусь сонтемензэ. Шкань ютазь, сынь састь мекев. Ведьгевесь аштесь тевтеме. Азоронть цёразо кундась витнемензэ-петнемензэ ды куломозонзо важодсь тосо, куш колхозонть ульнесь эсензэ ведьгевезэ. Зярдо кулось те цёраськак, яжавтомкась кадовсь урозокс ды мейле понгсь «Лудорвайс»…

Вармаведьгевенть витнизь-петнизь, сон важодиця. Ансяк седе сеедьстэ ашти тевтеме, кармавтнесызь бути кодамояк покшчистэ. Совавтнимизь сонзэ потс, ёвтнесть важодемалувдонзо ды кузтнимизь сехте верце кепедьксэнтень, косто вадрясто неявить «Лудорваень» кудотне, ули-паротне.

Седе тов ютынек чувтосо керьксазь кужинес, косо аравтнезь аштить чувтосто зярыя керсевкст. Панжадо менель ало музейсэнть меельце шкасто кармасть ютавтнеме урьвакстомат, секс тейстькак башка кужине, илязт меша урьвакстыцятне музеень инжетненень. Те кужинесэнть одтнэнь туртов ютавтовить эрьва кодат пелькстаминеть.

Теде мейле ютынек ве ёно аштиця покш кудо ваксс. Те кудонтькак ускизь лия велестэ. Аволь умок кудонть азоронзо цёразо урьвакстсь, ды тетятне-аватне ёвтакшнызь мелест ютавтомс те коенть эсест кудосо. Музеень важодицятне эзть моле каршо, теде тенек ёвтнесь экскурсиянь ветицясь. Совсевтимизь кудонть потскак.

Сеске неяви, сон аволь кажов ломанень. Вакссонзо ули кизэнь кудояк. Тосо, келя, лембе шкасто эрясть аволь умок урьвакстозетне. Эрьва урьванть ульнесь эсензэ нупалезэ, илязт сёвнозеве эсь ютковаст. Нупальтне вишкинеть, вальмавтомот. Валдось, келя, пек эзь эрявояк, тосо ансяк удсесть, истяк чинь перть важодильть кудоюрсо. Удома тарканть кувалмозо вишкине. Кода мерсь экскурсиянь ветицясь, удмурттнэ ульнесть аволь сэрейть: 150 сантиметрат сехте сэрей аватне ды 160 –– цёраломантне. Стенатнень кувалт чавозь кувака слегат, лангсост поволезь оршамопельть: лия путома тарка арасель.

Ёвтнесть тенек, кода удмуртонь од тейтертне анокстасть мирденень лисемантень. Те анокстамось малав вейкетель эрзятнень, маритнень, комитнень анокстамо лувост марто: эрямонь койтне вельть малавиксэльть. Тейтерентень эрявсь стамс-викшнемс эстензэ оршамопельть ды од кудораськентень казнеть. Весемесь тейневсь эсь кедьсэ ды кувать, секс удмуртонь тейтересь мирденень лиснесь 27 иеде мейле. Эно, сеедьстэ мирдетнень ансяк лемест ульнесть «мирдеть», иень коряс савкшность нитненень эйкакшокс-ялаксокс. «Важоди-пикси тейтересь кудоютконь тевтнесэ чинь-чоп ды чокшне ёнов моли усксы пандо прясто салазкесэ кирякстниця мирдензэ»,  – ёвтнесь тенек экскурсиянь ютавтыцясь.

– Мезе саить эстеть те фестиваленть эйстэ? Паряк, Мордовиясояк эряви истямо ютавтомс?

– Те мероприятиясь казсь монень од содавикст, сон лездась чарькодемс, кодат тевтне малавикс раськетнень литературатнесэ, кона республикасонть кодамо мель явови тиринсентень. Мордовиясояк кой-мезть ютавтневить. «Палэзянось» – те удмурттнэнь арсевксэст, ды сон аволь берянь. Арась смусть миненекак истямо фестиваль ютавтомс. Бути лия кодамояк, од, эсенек арсевть. Паряк, литературанть марто седе сюлмавозь. Содазь, весемесь ярмакто ашти.

Татьяна Маторкина

Фототне Алина Подгорновань