Галина Анатольевна Явкина 2008 иестэ саезь важоди МР-нь Образованиянь министрань полавтыцякс. Сонзэ кедензэ ало республикань образованиянь весе учреждениятне. Сынст важодемаст мельга эряви пштистэ ваномс. Мейстэ весемесь ушодовсь ды кодамо эрямонь кизэ те эрзянь мазый ды превей аванть, ёвтнетяно тынк туртов.

– Галина Анатольевна, ёвтнеде эсенк эйстэ, косо чачиде-касыде, косо тонавтниде.

– Чачинь 1966 иестэ Отяжбуень Аловелесэ. Семиясонок ниле эйкакшт. Мон сехте покшось. Тетянь ды авань ёндо покштянень-бабанень ульнинь учовикс нуцькакс, секс, арсян, касыньгак истямо вечкемасо. Эйкакшпингем ютась велесэ. Тетям эрямонзо перть важодсь электрикекс, авам – профессиянь коряс математик, ансяк школасо важодсь аволь кувать. Сазоронзояк математикть. Паряк, те монень сынст пельде ютась. 6-7-це классо тонавтнемстэ эстень меринь: карман математикань тонавтыцякс. Те предметэнть ветясь Галина Терентьевна Климбовская, конань вечкилия. Се шкане университетсэ тонавтнемась марявсь покш тёкшокс, атопавтовиця мелекс. Те меленть кирдинь потсо ды киненьгак эзинь ёвтне, пелинь кортамскак.

Школам прядыя сырнень медаль марто. Эрявсь максомс ансяк вейке экзамен. Бути те экзаменэнть макссак «ветес» – тон уш студентат. Секс стакачить арасельть, экзаменэм максыя ды карминь Н.П.Огарёвонь лемсэ МГУ-нь математикань факультетэнь студенткакс. Студентэнь эрямось – сехте мазый шка. Ули мезе ледстнемс. Саемга, стройотрядтнэ – те эрямонь алкуксонь школа. Мон ульнинь отрядонь командирэкс. Якилинек планёркас, минек кедьстэ кевкстнесть кода специалистэнь пельде. Ответственность покш ульнесь. Мейлень эрямосо стройотрядсо важодемась макссь покш лезэ. Пандыльтькак сестэ вадрясто. Мон натой лездынь тетянень-аванень пурнамс школав лия сазорон-ялаксон.

5-це курссо тонавтнемстэ вастовинь мирдем марто. Сон студент ульнесь. Эринек весе вейсэ, механикть ды математикть, ошонь 7№ общежитиясо. Сон – шабра райононь, Орданьбуень. Лемезэ – Юрий Алексеевич. Тонавтнеме сась армиядо мейле. Мон вузонть прядомадо мейле карминь роботамо 18 № ошонь школасо. Иень ютазь туинек эрямо сонзэ велес – Орданьбуень Мурзав (Кельвядни). Мирдем кармась важодеме инженерэкс-механикекс (колхозось кучокшнызе тонавтнеме, секс эрявсь велявтомс). Мейле кармась колхозонь председателекс, велень администрациянь прявтокс.

Тиринь велекс лован кавто велетнень. Аловеленть, косо чачинь-касынь, ды Мурзанть, косо теевсь семиям, чачсть эйкакшон, косо пурнавсь васенце коллективем, ульнесть изнявксон ды ильведевксэнь.

– Кода ушодовсь тынк тонавтыцянь кись?

– Мон эзинь кеме, карман велесэ кувать эрямо ды важодеме. Мельсэнь аштесь эсень Аловелесэ школам, кона пек покшоль, тосо тонавтнесть тёжа эйкакшт. Мурзасо школась ульнесь начальной. Зданиясь ташто, сядо иеть тензэ. Те ансяк мейле теевсь основной школакс. Эйкакшт кармасть ламо, саень эйкакшт кармасть велесэнть трямо. Пурнакшнынек «Валскень зоря» ансамбля, косо морсесть од тонавтыцят. Велень эрямось весе ульнесь ансамблянть перька, тешкстынек покшчитнень. Вельмевтинек ды кирдинек, ванстынек ды келейгавтынек велень койтнень, путнинек спектаклят. Ардтнинек лия велева, шабра районга, Чувашиява. Теде башка, пурнынек музей. Сакшность тенек ламо писательть, поэтт, вастовомат ламо ульнесть. Минсь якинек Тиринь келень чинь тешкстамо Эстонияв. Те весе макссь важодемантень ды тонавтомантень покш вий, ойме.

Г.А.Явкина Мурзасо васня важодсь тонавтыцякс, мейле – завучокс, седе тов – школань прявтокс. Сонзэ покш мелезэль теемс школанть мазый таркакс. Кучсть сёрма МР-нь сестэнь Прявтонтень Н.И.Меркушкиннэнь. Сон маринзе ды макссь покш лезкс. Ташто школась витнезель-петнезель. Тейсть спортзал, чийнемань кить-янт, школанть одкстомтызь-мазылгавтызь. Мейле тонавтыцятнень марто кармасть кочкамо ёнкс, конань коряс седе домкасто важодевельть школасо. Эрьва школанть эсензэ лувозо. Седе малавикс ёнксокс кочказель раськень койтнень вельде духовно-нравственной тонавтомась.

2003 иесь Галина Анатольевнань эрямосо ашти мазый лопакс. Эрявсь невтемс пря «Иень тонавтыця» конкурссонть. Сон эзь карма молеме каршо, бажась варчамс виензэ. Васня ульнесь районной этапось, косо сон изнясь. Мейле эрявсь невтемс райононть республикань пелькстамосонть. Тосо сон лиссь суперфиналс. Тонавтыцянть туртов те ульнесь покш изнявксокс. Мейле сонзэ тердтнизь Венгрияв, косо ютась национальной образованиянь коряс конференция. Эрявсь анокстамс кортамо.  Весе те Галина Анатольевнань туртов макссь од эскелькс икелев.

2006 иестэ Орданьбуень районсо прявтокс ладязель В.Н.Сидоров. Г.А.Явкинань сон саизе эсензэ командас, образованиянь управлениянь прявтокс. Малав 3 иеть топавтсь те тевенть. Шкань ютазь тердизь важодеме МР-нь Образованиянь министрань полавтыцякс.

– Те весе ульнесь апак учне. Эрявсь весе кадомс ды самс тей. Пурнынь малавиксэнь ды кортынек. Сюкпря ёвтан мирдем туртов, сон эрямонь весе неть эскелькстнэсэ монень лездась. Зярдо кудосо кияк а лезды, а чарькодить эйсэть, а кемить, стака теемс истят виде эскелькст. Сон мерсь: «Кие, бути аволь тон? Неидизь, лисни, кемить теть. Варчик». Чарькодинь, карми аволь шожда. Ансяк ве таркасо а кармат аштеме. Сонзэ пельде те чарькодемась макссь тень вийть.

– Бути ледстямс се шканть, стака ульнесь ушодомс важодеманть министерствасо?

– Зярдо тон састо кузить весе кузтеминетнень: тонавтыцясто саезь прявтонь полавтыцяс, завучто мейле школань прявтокс, образованиянь управлениянь прявтокс, тон седе келейстэ ды домкасто неят весе стакачитнень, конат улить образованиясо. Ней важодемам сюлмавозь ванкшноматнень марто. Школат, эйкакшонь кужот, техникумт. Весень ваннотано. Образовательной тевень ветямга макстано лицензия, тейтяно аккредитация программатнень туртов, конат сынст улить. Ансяк ютат школань ортатнева, сельмезэть сеске весе каяви, неяви ды чарькодеви, кодамо тесэ прявтось, кода юты важодемась. Тесэ тонавтыцят эли жо ансяк уроконь максыцят, ули ойме путозь эли арась. Те васенце вановтось. Мейле ваннат документтнэнь. Образованиясо контролень ды надзоронь службась панжовсь МР-нь Прявтонть кармавтоманзо коряс 2009 иестэ, самай сестэ мон сынь. Пурнынек 10 специалистт, мартост важодян 7 иеть. Весе те шкас мартон роботыть. Кияк неть иетнестэ эзь туе. Тесэ лия уровенесь, седеяк покш ответственность, вешематне покшт. Эсень специалисттнэнень свал мерян, эряви улемс ломанекс, прянть ветямс парсте. Ваномс, мезе прявтось паро теи, теке марто, невтемс асатыкстнэнь истямо ладсо, сынь тонь замечаниядо, предписаниядо, протоколдо мейле илязт сёрмадо туемадо яволявтома. Чарькодевлизь, мезень кисэ мурнизь, ды ёвтавольть сюкпря. А эряви молемс ансяк сёвномань, сялдомань, мезеньгак муемань кисэ.

Мелят Орданьбуесэ ЕГЭ-нь максоманть марто событиясь, нама, зярдояк а стувтови… Зярдо важодят тосо, содасак системанть ды истямо зыян лиси, седееть пачка юты. Те монь туртов ульнесь покш вачкодькс. Эсень районсо, косо коллеган, минек эйкакштне. Мон те шкас а чарькодян, кода те весе лиссь, мекс? Истямо покш зыян, конадонть кармасть содамо Россиянь келес, кона невтизе республиканть аволь паро ёндо. Те мелень зыянось эзь юта ды те шкас ашти потсон. Кеман, икелепелев истямо тев косояк а лиси.

– Галина Анатольевна, ёвтнеде семиядонк.

– Монь кавто тейтерень: Ольга ды Виктория. Ольга Мурзань 9 классонь прядомадо мейле тонавтнесь университетэнть юрсо республикань многопрофильной академической гимназиясо. Тосо пек домка содамочить макссть. Мейле прядсь филологиянь факультетэнь «Журналистика» отделениянть. Седе тов тонавтнесь юридической факультетсэ. Ней эри ды важоди Московсо. Кисэнзэ седеем а ризны. Омбоце тейтерем, Вика, теке жо гимназиянть прядызе медаль марто. Сон тусь монь киява, тонавтнесь математикань факультетсэ, важоди специальностень коряс. Мирдем роботы мода лангсо. Сон вети фермерэнь хозяйства. Стака тензэ явомс веледенть. Посевнойть-уборочнойть – сон свал тосо. Истяк, мон тов яксян, сон тей сакшны. Веле ды ош ютксо эрятано. Мезеяк берянесь теньсэ арась. Семиясо сехте эрявиксэсь – кемема, лездамо, вейкень-вейкень чарькодема.

– Галина Анатольевна, кода оймсетядо? Косто сайнетядо оймевийть?

– Сехте покш вий саян кельме ведьсэ валномастонть. Эрьва валске кельме ведьсэ валномо ушодынь велесэ эрямсто. Валске стян, пештян кельме ведь ведра. Ведентень кучан энергетика, максоволь тень ойме, вийть, кеж илязо уле потсон, чись ютаволь парсте. Сюконян, течи ули эштё чим. Эряви тень теемс кемема марто. Зярдо кельме веденть лангат валсак – мизолгадат, те мизолксось а туи чамастот  омбоце валскес. Велесэ, чарькодеви, те ульнесь седеяк паро – пертьпелькссэ, лисьма вакссо, луганар лангсо, менеленть ды моданть ютксо энергетикась лия. Вана течияк кавто ведрат ланган каинь, лиясто колмо ведраткак чамдан. Тельня эрьва Крештениясто якан экшелямо. Парсте оймаван ансяк велесэ. Кудонок тоско, вирь вакссо. Майстэ вишка отпуском ютавтыя тосо. Истя парсте ютавтыя шканть – омбоце иес саты паро ёжось. Маенть пек вечкса, те ковстонть чачиньгак.

Покш вийть истя жо максы монень авам, Надежда Николаевна. Сон Пазнэнь кемиця ломань. Весе эскелькстнэнь, конатнень теинь эрямосо – ансяк сонзэ баславамодо мейле. Зярс сон эри – мон аштян сёлминензэ ало, вансты эйсэнь. Зярдо модамасторсонть ули тарка, косо тонь учить, вечкить, кисэть озныть, кенярдыть тонеть – эрямосонть те сехте покш уцяска. Зяро иеть бу тонеть илязт уле, бути ават вакссот – тон свал сонзэ туртов улят эйкакшокс.

Маень 27-це чистэ Галина Анатольевна тешкстызе юбилеензэ. Арсетяно те валдо ломанентень кеме шумбрачи, сэтьме ды паро эрямо, важодемасо од изнявкст!

Татьяна Маторкина