Новости на эрзянском языке
207
Новости на эрзянском языке

ЭРЗЯНЬ МОРОТНЕНЬ УЛИ СЫ ШКАСТ!

Бочканов

Сонзэ моротнень кунсоломсто ёжось паролгады, морось кадови превсэ ды кельпрясо, мелеськак эйстэст а моли. Мекевланг, кунсоловлить эйсэст апак лотксе. Андрей Бочканов од морыцядонть карминь содамо мелят. Од ломанесь икеле эзь марсеве, апак учне косто-бути сась ды кецявтынзе весе кунсолыцятнень «Вай, кодамо» моросонть. Эряви меремс, тиринь кельсэ эстрадань морот неень шкане – тамашань тев. Сынь арасть. Од жанранть лангсо важоди самай сон – Андрей Бочканов, кона омбоце ие морси Мордовиянь государственной филармониясо. Течи содавттадызь тынк те лия ёнов а молиця, превей, ёроков од ломаненть марто.

– Андрей, косо тон чачить? Ёвтнек эсеть эйстэ.

Бочканов

– Весе ундоксон Кочкурбуень Кацялай велестэ, косо чачсть тетям-авам. Мон чачинь-касынь Рузаевкасо. Тетям важодсь машинистэкс, авам – тонавтыцякс. Школасо свал весе кенярксчитнесэ морсинь. Прядынь музыкальной школа, косо налксинь аккордеонсо. Музыкась монь туртов ульнесь хоббикс. Школанть прядомадо мейле тонавтнинь Н.П.Огарёв лемсэ МГУ-нь архитектурно-строительной факультетсэ. 7 иеть тосо тонавтнинь. Прядынь магистратура. Студентэнь шкасто истя жо эрьва косо морсинь, саемга, «Студентэнь тундотнесэ». 5-це курссо вейке репетициясо редимим МР-нь Заслуженной артисткась Оксана Глебова. Сон кармась мартон важодеме, вайгелень путомо. Нейгак монь педагогом. Весть мерсь: «Азё, варчик невтемс прят филармониясо, паряк, сайтядызь». Тосо невтия, кодамо репертуаром, неень шкань эстрада, кона алтави од ломантнень туртов. Филармониянь прявтось кунсолымим ды васня саимим договоронь коряс. Сестэ важодинь Рузаевкань суликань заводсо. Стака тень марявсь эрьва чистэ топавтомс секе тевтнень, прясь те шкане тунь а важоди. Мейле аволь кувать важодинь ошонь культурань кудосо. 2015 иестэ саезь важодян филармониясо. Лиясто ардтнетяно концерт марто Мордовиява ды республикань томбалев. Мон важодян истямо таркасо, косо тень вечкеви.

– Зярдо тон кармить явомо мель келентень ды ушодыть морамо эрзянь кельсэ?

– Кизна сеедьстэ яксинь велев, эринь бабань кедьсэ. Сон кортась мартон ансяк эрзякс. Мон келенть чарькодинь, ансяк кортамо эзинь машто. Мейле университетсэ тонавтнемстэ Н.Ф.Кабаева миненек ветясь мокшонь кель. Паряк, сон совавтсь мезеяк прязон, паряк, монсь чарькодинь, арсезевинь: косто саевсть эрзятне ды мокшотне, косто лиссь минек раськесь? Теде мезеяк а содылинь. Карминь содамо, ули литературань кель, нормат. Ломантне кортыть аволь ансяк Кацялай ладсо, эрьва веленть эсензэ кортавксозо. Эряви кортамс видестэ, аволь кода тонсеть Кацялай велесэ пельс мокшокс-эрзякс. Улить валт, конатнень мекс-бути ёвтатано рузокс, кадык ули вариантост эрзянь кельсэяк. Ды кода-бути апак учне сась мель сёрмадомс моро, ков совасть эйкакшпингень весе ледстнеман: кода велев ардтнинь, мезе тосо теинь, калт кундсинь, ведьс пракшнынь, сеянь ловсодо симинь... Истя чачсь «Вай, кодамо» васенце морось. Монень ламо ломанть пшкалесть, келя, те морось – весе сындест. Лисни, аволь ансяк монь эйкакшпингем истя ютась, ламонь! Истя весе ушодовсь…

Эрьва од моронть лисемадо мейле кунсолыцятне сёрмадыть Андрейнень ламо лембе валт. Весе ойместэ ёвтазь паронь арсематне лездыть, максыть вийть ды сёлмот важодемс седе тов. Филармониясо эрзянь моротнень вастызь пек вадрясто. Эдь теде икеле истямо арасель. Ды неень шкане мезеяк истямо арась. Мелят концертэнь сезонось панжовсь А.Бочкановонь морамосо. Залось вастызе лембестэ.

Бочканов

– Мон эзинь учне. Мелявтынь. Седеем ризнэсь, кода жо весе юты, кода залось вастсы. Сюкпря Пазонтень, весе ютась парсте. Нейгак мельсэнь кирдян сеть ёжомарямотнень. Минек филармониясо покш концерттнэ – те сезононь панжомась ды Ташто Од иень вастомась. Сынь сехте учовикс ды эрявикс концертт. Ташто Од иень концертсэнть невтия «Вачодо ванан» омбоце мором. Морось лиссь стакасто. Яжавсь аранжировкань программась. Мейле сэрединь, ёмась вайгелем. Ковонь перть эзинь кортаяк, лецинь. Седе тов туинек гастролев МР-нь Народной артистканть Н.В.Спиркинань ды Н.П.Спиркинэнь, «Арсема» киштемань группанть марто. Ардтнинек Самара ды Оренбург ёнксонь эрзянь ды мокшонь велетнева. Те монь туртов ульнесь од тевекс – ардтнемась ды ваныцятнень марто вастовомась. Седеем токизе лия ёнкссо морамось. Тосо ломантне кортыть эрзякс минек ладсо, кода Кацялайсэ. Вастымизь парсте, теке малавикс ломантнень.

Тосто самодо мейле моронть сёрмадынек. Ташто Од иень концертсэ невтия. Вастызь вадрясто. Интернетсэ сёрмадсть эрьва кода. Кортасть истяяк: тесэ ансяк валтнэ эрзянь, мезеяк лия эрзянь арась. Сонсь музыкась аволь минек. Ну, арсян, тевем лиссь. Монь арась истямо мелем, теемс весе моронть ды аранжировканть эрзянь народной морокс. Те аволь раськень кезэрень моро, те – эстрадань неень шкань моро. Койсэнь, ломантне тонадсть эрзянь ды мокшонь моротнестэ марямс кодаткак гайтть, раськень мотивть. Васняяк бажинь невтемс келенть, пачтямс, минек кельтнесэяк гайгить неень шкань моротне ды сынь паро ёнкстнэнь коряс а явовить рузонь моротнеде. Ламот кортыть, келесь берянь, а мазый, мезекс кортамс те кельсэнть? Зярдо истя кортыть, мон ансяк мизолдан каршост. Те кортыть сетне, кить келенть а содасызь парсте, улить ютксост эрзят ды мокшот. Сынь а вечксызь эсь келест. Ломантнень арась мелест седе домкасто тиринь келенть тонавтнемс. Тень а чарькодьса. Сёрмадстынь «Сятко» журнал, ловнан К.Абрамовонь произведениянзо. Нама, те стака. Саят валкс ды мартонзо ловнат. А кода эно? Вечкеви, зярдо кодамояк авторонть келезэ-лувозо вадря, ловнови шождасто, ловнат ды дивсят, ванта, минек кельсэ кода мазыйстэ ёвтави!

– Андрей, кода содатано, тон сёрмадыть морот эйкакштнень туртовгак. Косто сась те мелесь, паряк, вешсть пельдеть?

– Апак учне, кияк эзь веше. Та-кода аштинек-кортынек «Карусельки» эйкакшонь морамонь студиянь ветицянть О.А.Антиповань марто. Ёвтнинь, мором лиси эрзякс. Сёрмадт, келя, минек туртовгак мезеяк, мерсь сон пейдезь. Сон мерсь ды стувтызе. Мон жо озынь сёрмадомо. Ды весть, веньберть, састь прязон «Эмежнетне» моронь валтнэ. Сеске сёрмадыя. Ловнан-ловнан, омбоце куплетсэнть мезе-бути аволь истя. Руз ютксо эрязь эрзянь келесь а стувтови, ансяк мезе-бути моли а истя. Аванень ловныя, сон мерсь, валонь петне аволь видестэ ладязь. Одов сёрмадыя куплетэнть. Эйкакштне кармасть моронть тонавтнеме. Молинь тенст репетицияв. Зярдо эйдетне моразевсть – рунгован коткудавнеть чийнезевсть! Акцентэсткак малав арасель. Омбоце репетицясонть весе валтнэнь содылизь. Мазый костюмт тенст стасть. Те моронть марто ардтнесть Московов, косо сайсть васенце тарка. Мейле сёрмадынь «Икелев» эштё моро студиянь покш группантеньгак.

Андрей Бочканов моронь эрьва кодамо фестивалень (саемга, «Наследники Победы», «Шумбрат, Мордовия!», «Афганское Эхо», «Ретро-Шлягер», «Од вий» ды лият) лауреат ды изниця. 2017 иестэ сон якась Тулав, косо ютась Весероссиянь Студентэнь тундось. Тосо Андрей «Авторская песня» номинациясонть саизе 1-це тарканть. Морызе «Вачодо ванан» моронть. Морось эрзянь кельсэ, малав кияк эзь чарькоде, сень лангс апак вано, вастызь вадрясто. Кода лиякс, бути сон неень шкань, од ломанень, мазый ды гайгиця. Теде башка, моронть марто киштсь тейтерька, сон кавксть полавтынзе оршамонзо, оршась эрзянь стилизованной паля. Мордовиясто тов якасть 10 ломанть. Сынь усксть тосто 5 казнеть.

Аволь пек умок морыцянть лиссь «Мельгат чиян» од морозо. Ней сонзэ эйстэст весемезэ кото. Валтнэ ды музыкась эсензэ, аранжировканть теить лият. Эряви меремс, весе те эсензэ ярмак лангс. Нама, эрьва морось сти питнейстэ, ансяк ков молят, кинень пшкадят? Бути ули мелеть – весемесь састыне топавтови, изняви. Нейгак улить ламо лия мелензэ ды бажамонзо.

Тедеде Андрей мольсь тонавтнеме Саранскоень музыкальной училищав. Ниле иеть карми пурнамо превть «Хоровое дирижирование» отделениясо. Бочкановтне кудосояк кортыть эрзякс. Василий Андреевич тетязо ды Людмила Никитична авазо кецнить цёраст кисэ, ды кадык эзь туе строителень эли архитекторонь киява, сон яви покш мель вечкевикс тевентень – музыкантень. Седе ламо бу истят ломанть, конат мезеяк лангс апак вано молить ансяк икелев ды теить паро, валдо тевть!

 

Татьяна Маторкина

Рассказать друзьям