Новости
1939
Новости

Йовлань Олонь ледстнемга панжозь кеврунго

Открытие памятника Владимиру Ромашкину
Открытие памятника Владимиру Ромашкину


Тедедень умарьковонь 29-це чистэ, Вирь ало Тавласто ардомсто, косо стявтозель В. И. Ромашкиннэнь од кеврунго, мон арсинь: кодамо улевель эрзянь культурась, а пурнындерявлизе те ломанесь «Тораманть»? Кажов сон улевель. Зяро морот стувтовольть, зяро кезэрень эрзятнень эрямосто артовкскеть ёмавольть! Ды аволь ансяк эрзятнень. Мокшотненьгак, каратайтненьгак.

Открытие памятника Владимиру Ромашкину

Открытие памятника Владимиру Ромашкину

Открытие памятника Владимиру Ромашкину

Открытие памятника Владимиру Ромашкину

Открытие памятника Владимиру Ромашкину

Открытие памятника Владимиру Ромашкину

Открытие памятника Владимиру Ромашкину

Открытие памятника Владимиру Ромашкину

Пурнызе «Тораманть»… Шожда ней миненек тень ёвтамс! Кавто валт, ансяк зяро сынст удало ашти важодема, зяро стакачить! Кить содылизь Йовлань Олонь, сеть ледстнить, кодамо мель а явома ды лепштямо савсь печтямс сонензэ. Весементь цидярдызе. Ансяк ормась эзь цидярдово. Ломанесь – аволь кшни… В. И. Ромашкин ванстызе эрзянь моронть, кона прок томбазь сёлмо марто Иненармунь лепштязель модантень, эзь ливтне ды эзь гайге. Сон эждизе те Иненармуненть эсензэ оймекоштсо, явсь тензэ эсензэ вийдензэ, седе кеместэ ды верев ливтязо. Ды Иненармунесь вельмесь. Сон виемсь ды гайгезевсь ламо вайгельсэ. Сон тусь ливтямо мастортнэва ды оштнева. Сон нейгак ливтни. Минь сонзэ кунсолотано, кода паро мельсэ кунсоловлинек покштянок-сырькаенек кезэрень шкатнеде ёвтнемаст.
А стяко эрзянь эрьва покшчись панжови «Тормань» моросо. Те кармась улеме аволь ансяк коекс, вейсэндиця рисьмекскак. Вана Вирь ало Тавлань этно-кудосо гайгезевсь «Тюштясь». Вана ломантне крыльцянть вакссто сыргасть вальмалов, косо ашо коцтсо вельтязь ашти Йовлань Олонь од кеврунгозо. Вана весе стясть икелензэ. Кирвазсь Раськень Штатолось, топавтовсь озксось. Андрей Ромашкин – Йовлань Олонь цёразо, «Тораманть» поладыцязо вейке ёндо ды Н. М. Филатов скульпторось, кеврунгонь
теицясь – омбоце ёндо каизь ашо коцтонть… Минек лангс варштась Йовлань Оло. Сон невтезь лавтов видьс. Ашти видестэ. Вановтозо бажи та-ков икелев. Бути аштемс видьстэ сонзэ коряс, маряви: сон ваны тонь потс. Конясонзо кавто домка сормавкст, конат лиснить кувать арсемстэ. Кирьгасанонзо таргавсть сурбунакс, сынст лангс ваномсто арсезевинь: «Сон прок анокстась серьгедемс моро! Те морось анок уш лисемс, гайгезевемс пертьпелькссэнть!». Ансяк неть калгодо турватнень аволь истя шожда явомс… Пародояк паро лиссь бюстось! Эйсэнзэ неяви ломанень обуця.
Те бюстонть икелев лиссь Н. Родионова. Сон лайшизе эрзянь раськень ёмавксонть, мусь эрявикс валт ёвтамс вейсэнь сэредьксэнть. Ламот кортасть те чистэнть, ламот пародояк паро валсо ледстнизь Йовлань Олонь. Сынст ютксо – од ломантькак. Те корты седе: сонзэ валдо оймезэ нейгак кирвазтни ломантнень седейс тиринь моронтень, тиринь раськентень вечкема. Ды те кодамояк питнесэ а онкстави.

…Масторавась лужакадсь, зярдо 2002-це иень умарьковонь 29-це чистэ эрямосто тусь Владимир Иванович Ромашкин. Масторавась аварьгадсь, зярдо лоткась марямо цёранзо чалгавкстнэнь эрзянь моданть лангсо. Мекс Масторось лужакадсь? Мекс эрзянь ломантнень сельместэ кувака рисьмекс тусть сельведтне? Секс: те ломанесь ульнесь минек раськенть алкуксонь сюпавчикс. Ды каня мереват эйстэнзэ – ульнесь?!

     Сермадеесь:                               Алина ПОДГОРНОВА


Совадо видеотнес тия: 




Рассказать друзьям