«Мереманть» васенце этнографиянь невтевксэнзэ

Якшамковонь 14-це чистэ «Саран ошонь культурань кудо» МБУК-со ютась «Мерема»  Раськень морамо куронть этнографиянь невтевксэзэ. Сонзэ эйс совасть Мордовия Республикань (Отяжелень, Кочкуровань, Зубово-Полянань, Инсаронь, Ковылкинань буетне) ды Пенза (Сосновоборской, Городищенской буетне) ёнксонь раськень эрьва кодат кедьёнкст ды оршамопельть. Весе невтезесь пурназель «Меремань» этнографиянь экспедициятнесэ.

«Минек морамонь курось теезель 2010-це иестэ, – ёвтни «Меремань» прявтось Екатерина Модина. – Неень шкас минь морынек ламо велетнесэ, косо эрить эрзятне ды мокшотне. Теке марто ушодынек пурнамо седикелень эрьва кодат кедьёнкст, оршамопельть. Течи минек юты васенце покш невтеманок. Невттяно весементь, мезе пурнынек кавто меельце иетнень перть. Прявт тевенек – содавтомс минек ошонь эрицятнень эрзятнень ды мокшотнень оршамопелест ды кедьёнксост марто».

Невтевкссэнть пурнавсть ламо сыцят. Сынст ютксо ульнесь 18-це школань, 19-це гимназиянь ды Мордовия Республикань эйкакшонь музыкальной школань-интернатонь тонавтницятне. Теде башка весе сыцятне теевсть содавиксэкс чувтосто керсемань налкшкетнень марто, конатнень невтизь «Эрьмезь» вейсэндявксонь 12 кедьчелькевтне. Невтевсть керьстэ теевкстнэяк.

Лембе вал марто рузонь, эрзянь ды мокшонь кельсэ весенень пшкадсь «Саран ошонь культурань кудо» МБУК-онь прявтось Александр Иванов. Сон тешкстызе: те невтевксэсь пек эряви эйкаштнэнь туртов ды карми кастомо сынст эйсэ покш вечкема тесэнь эриця кавто малавикс раськетненень. Пси поздоровт ды сюконямонь валт весень туртов ёвтасть «Мерема» Раськень морамо куронь прявтось Екатерина Модина,  «Эрьмезь» Вирь Ало Тавлань чувтосто керсемань вейсэндявксонь прявтось Калаганонь Керяз (Пётр Рябов), раськетнень ютксо ды кемематнень ютксо сюлмавоматнень кевкстематнень коряс куронь прявтось Елена Щукина, Мордовия Республикань Теевксэнь коряс (Заслуженной) важодицясь, Мордовия Республикань Артыцянь вейсэндявксонь прявтось Александр Занкин, «Морамо» кезэрень эрзянь ды мокшонь моронь морамо куронь прявтось Геннадий Дулкин.

Невтевксэсь карми молеме якшамковонь 26-це чис.

Зинёронь Сантяй

Фототне Елена Макаровань

***«Мерема» раськень морамо курось теезь 2010-це иень таштамковсто. 2014-це иень даволковсто сон лемдязь фольклорно-этнографиянь курокс. Куросонть морыть фольклоронь вечкицятне. Сынст прявт тевекс ловови  раськень койтнень вельмевтемась ды невтемась. Прявтось – Екатерина Модина, прядсь А. А. Архангельскоень лемсэ Пензань музыкань училища, Н. П. Огарёвонь лемсэ университет. Теде башка сон
Н. П. Огарёв лемсэ университетсэ Раськень культурань институтонь раськень музыкань кафедрань тонавтыця, регионъютконь ды раськеютконь  моротнень пелькстамотнесэ изниця. Сонзэ курозояк изнякшнось ламо пельктамотнесэ, конат ютавтневсть Сарансо, Пензасо, Набережной Челнасо, Самарасо, Саратовсо, Ижевскойсэ, Омскойсэ, Сочисэ, Ало ошсо ды лия оштнэсэ, Эстониясо, Суомисэ ды Австриясо. «Меремась» изнясь раськеютконь премиянь максомась пелькстамосояк (Эстония). Морамо куронть улить шнамонь конёвонзо Рав лангонь финнэнь-угрань культурань куншканть пельде покшчинь анокстамонь ды ютавтомань кисэ. «Меремась» свал морси эрьва кодат покшчитнесэ: «Ошонь чи», «Мастя», «Изнямонь чи», «Содамочинь чи», «Медень чи», «Од ие» ды седе тов.