Минек республикасо тиринь кельсэ гайгить ансяк кавто радиот. Сынст ютксто вейкесь – «Вайгель» национальной радиопрограммась – ушодсь важодеме 2007 иестэ. Тедеде сонензэ топодсть кемень иеть. Аволь ламо ды аволь аламо. «Вайгель» радиопрограммась гайги 73, 88 УКВ частотасонть. Эфирэнь шкась – 16.00 чассто саезь 19.00 часос. Радиось гайги эрзянь ды мокшонь кельтнесэ, пачти республикань общественно-политической, социально-экономической, образованиянь ды культурань эрямодо. «Вайгелесь» яви покш мель эрзянь ды мокшонь кельтненень, литературантень, койтненень-кирдатненень. Эфиртнэсэ ёвтневи, кода эрить Мордовиянь ды сонзэ томбале эриця эрзятне-мокшотне. Кунсолыцятне содавтовить финнэнь-угрань раськетнень марто. Ды, нама, радиосонть свал гайгить тиринь кельсэ кезэрень ды неень шкань морот. Седе домкасто минек туртов ёвтни радиопрограммань редакторось С.В.Пивкина:

  – Кемень иеть, кода гайги «Вайгель» радиопрограммась. Ледстяса, кода весемесь ушодовсь. Васенце радиожурналисттнэнь ютксо  ульнесть эрзянь содавикс журналистэсь Татьяна Ивановна Ларина, мокшонь – Татьяна Николаевна Михалкина. Минь вейсэ арсинек, кодамо карми «Вайгеленть» форматозо, кодат кармить рубрикат, мезнень алтавить сюжеттнэ. Покш путовксост радионтень корреспонденттнэнь Людмила Савостькинань, Ольга Даниловань, зярыя иеть пек парсте важодсь Светлана Сюваева. Сюкпря весенень! Течи «Вайгельсэнть» важодить од ломанть, конат прядызь Н.П.Огарёв лемсэ МГУ-нть. Веенст тонавтнесть «Журналистика» отделениясонть, омбонстнэ – «Финнэнь-угрань филология» отделениясонть. Сынь парсте кортыть эсест тиринь кельсэ, тевень содазь саить интервьют, вадрясто анокстыть эфиртнэнь. Путыть весе виест ды оймест вечкевикс тевентень. Неть журналисттнэнь ламот содасызь, те: Марина Стешина, Любовь Виряскина. Сынь топавтыть эсь тевест кемень иеть. Умок сась редакцияс Екатерина Кирдяшкина. Елена Старкина совась минек юткс пельиеде икеле, сон – М.Е.Евсевьев лемсэ МГПИ-нь филологиянь факультетэнь студентка. Неяви, ули бажамозо, важодемась тукшны мелезэнзэ. «Вайгелень» журналисттнэ топавтыть аволь ансяк эсест тевест, истя жо кенерить тееме ламо общественной робота. Невтить эсь ёрокчист научной конференциясо, эрьва кодамо вастовомасо, конат алтазь образованиянь, культурань, социальной кевкстематненень. Истя жо пачтявлинь, маласо шкасто  миненек карми эрявомо корреспондент, кона бу содавлизе эрзянь келенть. Гайневтеде 24-85-42 телефонганть. Кодамояк программа а лиси эфирс звукорежиссёртомо. Александр Асташин ды Владимир Акулинин эсь тевень содыця, ёроков ломанть. 

Башка вал ёвтавлинь  прявттнэде (минек радиось сови «Мордовия-7 дней» АУ-нтень): неть – прявтонок В.А.Терёхин, прявтонь полавтыцянок М.П.Стрягина, бухгалтерэнек О.Я.Рязанова, конат бажить теемс весементь – улезэ минек, творческой ломантнень, важодеманок паро, илязт уле стяконь сёвномат-пелькстамот.

– Светлана Васильевна, кодатрубрикат улить радиопрограммасонк?

– Эрьва чи гайгить  истямо рубрикат:  «Содамочинь нупаль», «Содасасть ли тинь?», «Пингень гайть», «Перьфпялень лепне», «Эрямонь тешкст», «Тячи лятфнесаськ», «Раськень вий», «Содавикс лем», «Келесь – раськень ойме», «Озязонь пилес – кансёро», «Смузень арзяня» ды лият. Сынь максыть ламо мезе эрявикс кода одтнэнень, истя сыретнененьгак. «Финнэнь-угрань кулятне» ёвтнить седе, кода эрить малавикс раськетне, кодат тевть сынь топавтыть. Неть кулятнеде мейле максовить малавикс раськень кельсэ эрьва кодамо морот: финнэнь, маринь, удмуртонь, карелэнь ды лия кельтнесэ. «Сась инже» рубрикась – вастовома мокшонь ды эрзянь содавикс ломань марто. Неть – театрасо налксицят, морыцят, сёрмадыцят, музыкань ладицят ды лият. «Тиринь вал», «Минь литератураньке» рубрикатне содавтыть кунсолыцянть тиринь кельсэ ёвтнематнень, стихтнень, пеедькшнематнень марто. Сеедьстэ сон анокстави эсест сёрмадыцятнень лезксэст вельде. Эйкакштнень туртов важодить «Пейделькань кужине», «Идень куженя» радионь лопатне. Сынст анокстыть ошонь эйкакштнеяк, конат тонавтнить эрзянь ды мокшонь кельтнень.

– Косто сайнетядо эрзянь ды мокшонь моротнень?

– Морыцятне сынсь макснить од альбомост. Фонотеканок аламонь-аламонь пешкеди. Свал учотано, зярдо лисить од морот. Лиясто сайтяно од морот Интернетстэ.

– Светлана Васильевна, ладсетядо-арась эфиртнэнь сайтс?

– Нама, весе эфиртнэ а ладсевить, те ризнэвти кода эсенек, истя кунсолыцятненьгак. Технической ёнкстнэнь коряс те аволь шожда. Эфирэнь файлатне стакат. Минь сынст шождалгавттано. Те саи шка. Паро, звукорежиссёртнэ лездыть те тевсэнть. Тесэ вастневи лия асатыкс – Интернетэсь аволь виев, скоростесь лавшо. Секскак аволь свал кенертяно весе эфиртнэнь путомс. Минь жо аволь свал аштетяно студиясо. Якатано мероприятиява, вастневтяно ломань марто, сайнетяно интервьют. Мейле анокстасынек материалонть, кулятнень, седе тов весементь эряви сёрмадомс студиясо. Сайтэнть вельде кунсолыть эйсэнек лия ёнкссо ды омбо масторсояк. Тов путнетяно кулят, фотографият, материалт. «ВКонтакте» социальной сетьсэнть панжинек «Вайгелень» лопа, ков истя жо путнетяно кулят.

– Кодат меленк-бажамонк?

– Аволь умок нолдынек «Ёвкске-кавкске» ды «Смузень арзяня» ёвкс марто дискт. Тей совасть кода кезэрень ёвкст, истя жо неень шкань автортнэнь.  Дисктне нолдазь аволь микшнемс, сынст минь казнинек-явшинек эрзянь ды мокшонь ломантненень, сетненень, кить вечкить кунсоломо ёвкскеть. Ули меленек истя жо нолдамс эрзянь ды мокшонь кельсэ спектаклят.

– Светлана Васильевна, радиопрограммань диапазонось нурькине ды сон а кундави республикань районтнэва. Кодат улить мельть тень коряс?

– Пек бажатано покшолгавтомс диапазононть, полавтомс частотанть. Эфирэнь шканть истя жо. 2014 иестэ ютавтозь эрзянь ды мокшонь раськень Инекужонь Резолюциясонть пачтяви радионь диапазононть полавтомадо. Пек учотано, зярдо совить эрямос неть алтамотне.

 

«Вайгель» радионь редакциянтень арсетяно кеме шумбрачи, кемема ансяк парос, валдос, ванстодо эсенк раськень ойменк, икелев молема ки тенк!

 

Татьяна Маторкина