Новости на эрзянском языке
659
Новости на эрзянском языке

"Торамась" - Эстониясо

Торама в Таллине

«Торама» фольклорной ансамблясь якась «Тallinn Music Week» ошонь культурань Европань покш фестивалев. Сон ютась Эстониянь Таллинн ошсо. Тесэ невтевсть музыкань эрьва кодат жанрат. Фестивалень васенце чистэнть ансамблясь ютавтсь концерт Таллиннэнь ташто ды мазый таркасо, Kloostri Ait барсонть. Морамост кунсоломо якасть те масторсонть эриця эрзятне ды мокшотне. Ламотне оршазельть раськень оршамопельсэ.

Торама в Таллине

– «Торама» ансамблянть минь пек вечксынек. Васоло 1998 иестэ Эстониянь эрзянь движениянь прявтось Р.А.Клинова ды «Торамась» ульнесть паро инжекс финнэнь-угрань весе кенярксчитнесэ, конат ютасть Эстониясо. В.И.Ромашкинэнь ды Р.А.Клиновань ояксчинть вельде чачсь минек «Килейне» эрзя-мокшонь фольклоронь ансамблясь. Вейсэндявксонок юрсо сон важоди 18 иень перть. «Тораманть» марто аволь весть ютавтозельть вейсэнь репетицият, минь ламо тонавтнинек, кода морамс ламо вайгельсэ, – ёвтни Эстониянь «Сятко» эрзянь культурань вейсэндявксонь прявтось Наталья Абросимова.

Омбоце чистэнть «Торама» ансамблясь якась «Radio 4» радиов, косо коллективень прявтось А.Николаев ды морыцясь А.Учеваткин  домкасто ёвтнесть ансамблядонть. Сынст кортамост поладынзе Н.Абросимова. Сон пачтясь, кода В.Ромашкин цёранзо Виталий ды Андрей марто ютавтнесть сынст туртов вейсэнь репетицият.

Торама в Таллине

Фестивальсэ морамодонть башка, ансамблясь вастневсь Таллиннэнь университетэнь симфонической оркестранть марто. Сынь кортасть вейсэнь концерттэ, кона карми Эстониясо. Нама, коллективесь мораськак. Оркестрась кадовсь покш мельспаросо минек кезэрень моротнень кувалма. Те лезэв вастовоманть пурнызе Н.Абросимова.

Теде мейле «Сятко» эрзянь культурань вейсэндявксось тердизе «Тораманть» инжекс. Тагояк гайгсть морот, ютась вейсэнь репетиция, чайде симема ды явшевсть казнеть. «Сюкпря ансамблянтень истямо лембе вастовоманть кисэ. Минь, теке мерят, понгинек тиринь ёнксов, Мордовияв. Кемтяно, Эстониянь моданть лангсо вейсэ вастовтано эштё аволь весть», – мельспаросо пачтясь Наталья Абросимова.

Татьяна Маторкина

Рассказать друзьям