Новости на эрзянском языке
1080
Новости на эрзянском языке

Сызрань. Од толонь чи 2015. Кода те ульнесь.

Од толочь чи. Сызрань.

Мартонь 12-це чистэ Самара ёнксонь Сызрань ошсо келейстэ тешкстызь «Од толонь чинть». Кенярксчись алтавсь Сызрань ошонь Эрзя-мокшонь национально-культурной автономиянь 5 иетненень ды Самарань губерниянь теевемань 165 иетненень. Покш вастовомась ютась А.Н.Толстоень лемсэ драмань театрасо, конань аволь умок панжизь витнемадо-петнемадо мейле.

Тунда кезэрень шкань эрзятне ды мокшотне стаданть васенцеде панемстэ ютавтыльть озкс. Веленть песэ вастовильть весе эрицятне. Сонсь озксось молиль лейсэ-латкосо лисьмапря вакссо, тов панилизь кудонь ракшатненьгак. Тесэ коське тарадкетнестэ бажильть вельмевтемс од тол, кирвазтильть толпандя. Эрьва азорось сёвонень ваканс саиль мартонзо кудов уголият ды те толонть кирдильть иень перть, омбоце тундонть самс. Озксонь ютавтома таркасонть тейнильть зярыя толпандят, сынст перька ютавтылизь кудонь ракшатнень. Эрзятне бажасть ванстомост берянде. Мейле озныцятне озыльть лисьмапрянть ваксс ды ярсыльть мартост туезь каванявкстнэде. Васолов тусть неть шкатне. Минек раськесь а ютавтни истят озкст. Кадовсть ансяк сыретнень ледстнематнес ды мазый лемесь – Од толонь чи.

Од толочь чи. Сызрань.

Сызраньсэ те кенярксчинть тешкстыть эрьва ие. Сонзэ ютавтыцязо – Эрзя-мокшонь национально-культурной автономиянь прявтось И.В.Кистанов. Те тевсэнть тензэ лезды «Нармонь морыця» ансамблясь, конанень истя жо 5 иеть. Аватнень лангсо мазыйдеяк мазый оршамопельть. Васенце кевкстемам ульнесь вейке: косо сынь стазь, Мордовиясо? Кемтядо-аволь, палятне стазь кавто иеде икеле Сызраньсэ. Кодат кармить неть оршамотне, весе педе-пес арсинзе ансамблянь ветицясь Н.Г.Атаманова. Сон истя жо мусь лездыцят, конат пандызь стамонь питненть. Коллективсэнть морыцятне весе пенсиясот. Ули ламо юткошкаст вастневемс, морсемс концертсэ. Сынст репертуарсо эрзянь ды мокшонь малав 40 морот. Ютазь иенть прядовомсто коллективесь сакшнось морамо Саранскоев «Кезэрень модань од морот» фестивалев.

«Од толонь чистэяк» «Нармонь морыця» коллективесь вастсь весе инжетнень театрань фойесэ, морась кенярдовтыця морот. Мейле, нама, морасть сцена лангсояк.

Эряви меремс, Сызрань ошонь Культурань управлениясь истя жо лездась ютавтомс те покшчинть. Инжетнень туртов анокстазель мельстуиця программа. Ломантнеде пурнавкшность ламо, эль кельгстявсть театрань залонтень. Сакшность эйкакшост ды нуцькаст марто. Кенярксчиденть пачтявсь телевизорга ды яволявтомасо, конат понгавтозельть ошканть. Ломантнень туртов истят вастовоматне – оймень витема. Косто эштё марят тиринь кельсэ морот ды неят мазый киштемат?

Вана вишка штатолнэ марто залга ютасть эйкакшт, мейле кузсть сцена лангс. Тосо кирвазтезель покш штатол. Кенярксчинть панжизе И.В.Кистанов. Сон ёвтнесь раськетнень ютксо ояксчиденть, конань эряви ванстомс седе товгак. Теде мейле вал сайнесть инжетне: Сызрань ошонь администрациянь прявтось Н.М.Лядин, Самарань областень Губернаторонь администрациясто Д.В.Холин, Самарань областень «Масторава» эрзя-мокшонь национально-культурной вейсэндявксонь прявтось Л.А. Колесникова ды ламо лият. Ёвтазельть ламо сюкпрянь валт И.В.Кистановнень.

Мордовиянть пельде истя жо якасть инжеть: МР-нь Заслуженной артисткатне Анна Атласова ды Любовь Князькова, «Литова» эрзянь авань вейсэндявксонь членэсь В.Н.Чичамкина ды лият. Вал сайнесь Равчирень финнэнь-угрань раськень культурань центрань отделэнь прявтось Т.Т.Чекушова. Благодарностьсэ сон казинзе Эрзя-мокшонь национально-культурной автономиянь прявтонть И.В.Кистановонь, «Нармонь морыця» ансамблянь ветицянть Н.Г.Атамановань.

«Од толонь чистэ» невтезель пек вадря концерт. Лембестэ вастозельть эйкакшонь коллективтне. Саемга, «Карусель» хореографической ансамблясь анокстась баягине марто киштема. Пенза ёнксонь Бессоновской райононь Кижеватова велень «Келу» ансамблясь невтсь свадьбань кой.

Од толочь чи. Сызрань.

Од толочь чи. Сызрань.

Ульяновской областьстэ сакшность зярыя ансамблят. Эрьва иестэ эйкакшонзо марто тей сакшны Кузоватовабуень Кивать велестэ В.И.Буртасова. Сонзэ ули «Пизёлнэ» ансамблязо, конасонть киштить-морыть школасо тонавтницятне. Ламо цяпасть Настя Ерёминанень, вишка тейтернесь лиснесь няка марто ды морась нурсемань моро. Сынст лангс ванозь, седеесь пешкеди кецямосо: республикань томбалеяк ванстыть минек койтнень-кирдатнень, культуранть. Сюкпря эряви ёвтамс истят ломантненень, кода Валентина Ивановна. Аволь умок сон таго изнясь «Созвездие-2016» Весероссиянь пелькстамосонть. Истя жо Ульяновскойстэ ульнесть «Гармония» дуэтэсь ды «Пичечуля» рузонь-эрзянь моронь народной ансамблясь.

Од толочь чи. Сызрань.

Мельспароль кунсоломс РФ-нь Заслуженной артистканть Людмила Дюдяевань. Сон важоди Пётр Милославовонь лемсэ государственной Волжской рузонь раськень хорсо. Людмила Михайловна чачсь Мордовиясо. Тонавтнесь Казанень государственной культурань институтсо. 1987-1991 иетнестэ важодсь «Умарина» киштемань ды морамонь ансамблясо. 1991 иестэ саезь эри Самарасо. Нолдась «Золотая пора» моронь альбом. Сонзэ репертуарсо ламо моротне алтавить Россиянтень, тиринь масторонтень. 2014 иестэ тензэ максозь «РФ-нь Заслуженной артистка» покш лемесь. Самара ёнкссо вейкеяк эрзянь ды мокшонь кенярксчи а юты сонтемензэ. Людмила Дюдяева паро мельсэ морси эрзянь ды мокшонь мороткак.

Меельце пелев концертэнь весе участниктне вейсэ морызь «Вирев молян» моронть. Кие-бути манявсь ды лемдизе сонзэ Мордовиянь гимнакс. Кода илязо уле, морось гайги алкукс теке гимна.

Татьяна Маторкина    

Рассказать друзьям