Новости на эрзянском языке
1
Новости на эрзянском языке

Сонзэ поэзиясь талновты эрьва ловныцянть

DSC_0949.JPG

Мон содаса сонзэ аволь вейке ие. Мазый, превей, чевте седей. Бути ловномс стихензэ – сеске чарькодеви, кодамо те ломанесь. Видечинь вечкиця, эсь раськензэ кисэ мелявтыця-ризныця. Стихензэ смустень кандыцят, превс путыцят ды талновтыцят. Сынст ловномсто зярдояк а пупордят. Эрьва валось ашти эсь таркасо. Сынь шождат ды сеске саевить мельс-превс. Ловнат ды абунгалят, кодамо мазый эрзянь келенек. Кодат стихтне ды мезде? Эрямодо, вечкемадо, седе, мезе моли-тееви ломантнень оймесэ… Кода сынь чачнить? Теде ёвтни сонсь авторось, поэтессась Людмила Рябова. Теевтяно мартонзо содавиксэкс.

Кие тон 

– Людмила, косо тон чачить? Ёвтнек эсеть эйстэ.

– Мон чачинь Дубёнка ёнксонь Поводелесэ. Эйкакшпингем ульнесь пек уцяскав, кенярксов, маней шкакс. Ульнинь васенце эйкакшокс, касынь вечкемасо-кольневтемасо. Марина сазором вете иеде мондень вишкине. Васня эринек бабань кудосо, мейле стявтынек эсенек кудо теке куринкантень, бабань эйстэ аволь васов. Тетям-авам свал ламо важодсть, секс Палай бабам ульнесь монь туртов пек малавикс ломанекс. Эйдень кужовгак эзинь яксе, сон вансь эйсэнь ды свал ульнесь мартон. Школав туемадо икеле сон тонавтымим ловномо, путомо-саеме. Секс тонавтнемстэ монень ульнесь пек шожда.

Тетям, Александр Иванович, ловт, пингензэ перть важодсь Хлебозаводсо, усксесь кши минек буень лавкатнева. Сон маштыль парсте артомо. Тетянзо-аванзо кучиксэлизь тонавтнеме художественной школав, ансяк сон эзь моле, ульнесь мелезэ тонавтнемс машинань ветницякс. Тетям ютавтсь монь ды сазором марто пек ламо шка: сайнимизь калс, вирев – кстыйс ды горниповс. Тетянь ульнесь эсензэ лисьмапрязо, эрьва иестэ минь вейсэ якилинек ванськавтомонзо. Тувако кундсилинек сёлтсто калт ды тоско рестылинек тол лангсо. Тетям тусь эрямосто 51 иесэ… Сон пек а сатны тень, прок эсень пелькскем ёмавтыя… Авам, Надежда Михайловна, важоди микшницякс Поводелесэ. Сонгак пек чевте седей ломань, зярдояк эзь сёвно эйсэнек, свал чарькодсь весе мелявксонок-стакачинек ды нейгак бажи лездамс тенек мейсэ виезэ.

– Зярдо ушодыть стихень сёрмадомо?

– Вишкинестэ тетям сеедьстэ сайнилимим мартонзо лавкатнева кшинь усксеме. Ардомань перть налксемань лувсо ладсилинек вишка стихть. Миненек те пек вечкевсь. Мейле, 5-це классо тонавтнемстэ, эрзянь келень ды литературань тонавтыцянок Р.Е.Бурнаева макссь кармавтома сёрмадомс кинь мезе мелезэ. Ды тагояк тетям кундась монень лездамо. Арсинек сёрмадомс стих кудонок вакссо килейденть: кода озавтынек, кода кассь, кодамо мазый. Сестэ класстонок ламот сёрмадокшность: кие стих, кие ёвкс, кие ёвтнема… Сёрмадозенть коряс тонавтыцям паро валонзо кармавтымизь седе товгак терявтнемс виень те тевсэнть.

Курок Людмилань кармасть сайнеме тиринь келень ды литературань олимпиадатнес. 7-це классо сон саизе васенце тарканть районсо ды колмоценть Саранскойсэ. Истя пелькстась эрьва ие. Стихензэ лиснесть «Чилисема» журналсо. Тетязо-авазо кенярдсть кисэнзэ ды аштесть каштанчисэ.

Школань прядомадо мейле Людмила Рябова сась тонавтнеме Н.П.Огарёв лемсэ МГУ-нь филологиянь факультетэнь финнэнь-угрань отделенияв. Ульнесь мелезэ содамс ламо кельть.

– Университетэнь тонавтыцятне макссть монень келень коряс пек домка содамочить. Ули мелем ледстямс М.Д.Имайкинань, 1-це курссо сон миненек ветясь венгрань кель. Сон важодсь эрьва студентэнть марто, ульнесь кеме обуця ды паро содамочинь вешиця. Те кармавтсь минек путомо весе виенек тонавтнемантень. Зярдояк а стувтовить Д.В.Цыганкинэнь лекциянзо. Сон вечкиль ды маштыль лангсонок чевтестэ пеедькшнеме. Монень вечкевсть эрзянь ды финнэнь-угрань кафедратнень весе тонавтыцятне. Сынь свал ульнесть панжадот минек туртов, кирдсть мартонок ялгаксчи. Сюконян эйстэст эрьвантень.

Университетсэ тонавтнемань иетнестэ Людмилань кармасть тердтнеме од сёрмадыцянь семинартнэс. 2000 иестэ стихензэ васенцеде лиссть «Сяткосо». Мейле аламонь-аламонь журналонь прявт редакторось А.В.Арапов кармась макснеме тензэ ютавтовтомс мокшонь ды рузонь кельтнесэ сёрмадовкст. Васня тевесь марявсь стакакс, а содылинзе кельстэ кельс ютавтомань лувтнень. Шкань ютазь чарькодизе-муизе важодемань виде лувонть.

– А.В.Арапов монь туртов ульнесь аволь ансяк прявтокс. Сон ульнесь паро тонавтыцякс. Вечкиль эрямодонть, важодемань тевтнеде-валтнэде кортнеме, максыль превть. Ды, паряк, эстензэяк лиясто эрявсь содамс лия ломанень мель шкинемадонзо. Сон тонавтсь минек, одтнэнь, сёрмадомо, лиянь сёрмадовкстнэнь лангсо важодеме ды вешсь теемс весементь истя – илязо уле визькс ловныцятнень икеле.

Л.Рябова «Сяткосо» ушодсь важодеме студенткакс улемстэ. Те ульнесь нилеце курссо. 2005 иестэ саизь штатс, прозань отделэнь редакторокс. 2006 иестэ аравтызь топавтомо ответственной секретарень тевтнень. 2012 иестэ саезь сон – редакторонь полавтыця.

– Людмила, кода чачить стихтне? Кода сы коволось?

– Монень вечкевить эрзянь сёрмадыцянть Л.Седойкинэнь валонзо: «А эряви учомс шкинемань коволонть самонзо. Эряви озамс ды кармавтомс эсь прят сёрмадомо». Седе сеедьстэ истя эрсияк. Сёрмадан седе, мезесь талновты оймем, мезесь кармавты эйсэнь потсто паломо. Койсэнь, ансяк сестэ чачить алкуксонь виев стихть. Школасо тонавтнемстэ ламо сёрмадылинь пертьпелькстэ, мейле сёрмадынь ялгаксчиде, вечкемадо... Вейке ломань марто кортамодо мейле (куш те кортамось ульнесь аламодо казямо) лиякс варштынь поэзиям лангс. Сон мерсь, эряви сёрмадомс стихть, конат кепедить раськень ёжомарямот, тонавтыть лиякс ваномо эрямонть лангс, невтить перьканок теевиця паронть ды беряненть. Мон арсезевинь. Видеяк, эсень стихтнесэ мон седе ламо мель явинь эсень ёжомарямотненень-мелявкстнэнень. Ней бажан сёрмадомс седеяк, мезесь талновты лиятнень ды малавикс эстеньгак, сыненсткак.

Сеедьстэ валморотне чачить кодамояк ломань марто вастовомадо-кортнемадо мейле. Неть ломантне эрсить эрьва кодат – валдоткак, чоподаткак. Валморотнеяк лисить аволь вейкеть. «Сятконь» сёрмадстоманть коряс ламо савкшны ардтнемс минек буетнева. Аволь эрьва косо васттадызь мельспаросо. Эрси, покордатадызьгак. Монень а чарькодевить ломантне, конат эрзянь велесэ эрязь апаркстомить эрзякс тенст пшкадеманть кувалма.

Арсян, бути лететсь сюлмамс эрямом литературанть марто, бути мон кочкия те кинть, эряви сёрмадомс истя – сыремезэ ломантнень потсо валдо, кода корты Маризь Кемаль, кирвазезэ потсост а палыця штатолось.

Людмила Рябовань «Сиянь байгинеть» васенце книгазо лиссь 2005 иестэ, сон нолдазель «Ратор» журналонтень путовксокс. 2010 иестэ лиссь «Ливтясь нармунь…» омбоце пусмозо. Ней лиссь «Кие тон?» книгась. Стихтне эйсэнзэ явозь ниле кувтава. Нилецентень совасть морокс сёрмадозь стихтне. Кой-конатне эйстэст моразь, лиятне зярс учить эсест морыця.

– Людмила, кодат ёжомарямот печтят книганть лисемстэ?

– Мон пек кувать учинь ды анокстынь те пусмонть. Васенце кавто книган лангсо важодемстэ лездакшность тень А.С.Тикшайкин, А.В.Арапов. Явозельть нолдамгаст ярмакткак. «Кие тон?» пусмонть видьмексстэ саезь чачомас теия эсень вийсэ. Паряк, секс сон маряви сехте учневиксэкс-питнеекс. Пек лездасть тень тевсэяк-превсэяк «Сяткосо» важодиця ялган. А.С. Подгорнова ванкшнызе пусмонть, иляст уле ильведевкст, М.И.Кантеева теизе вёрстканть. Кувать арсинь лангаксонть ды лементь лангсо. Зярдо лемесь кочказель, лететсь тень понгомс Нижней ёнксонь артыцянть П. Алёшинэнь Саран ошсо ютавтовиця артовксонь невтемазонзо. Тосо сеске каятотсь сельмезэнь «Каргонь Ки» артовксось. Монень марявсь, сон пек лади монь стихтнес смустень коряс. Невтемадонть мейле пшкадинь Павелнэнь, ды сон мельспаросо кундась лангаксонть тееме – аламодо келейгавтызе артовксонть, арсизе лемень сёрмадома лувонть.

обложка

Аволь умок А.С.Пушкин лемсэ библиотекасо ютась Л.Рябовань шкинемантень алтазь чокшнесь ды «Кие тон?» книгань презентациясь. Тей пурнавкшность поэтэнть малавиксэнзэ, ялганзо. Сонсь авторось ды инжетне ловность стихензэ. Эрьвантень казезель од книгась. Ёвтазельть ламо паро мельть-арсемат Людмилань шкинеманзо коряс.

– Людмила – паро лирик, домкасто арсиця, пек келейстэ ваныця, васов неиця, пек мазыйстэ ёвтыця. Аламо кинень Пазось максы истямо ёрокчи. Мельспаросо аштян, кастынек эсенек мельга молицят, тевенек поладыцят! – кортась поэтэсь Р.С.Кемайкина.

Кие тон

Сайнесть вал «Сятко» журналонь прявт редакторось Т.В. Разгуляева, В.И. Ромашкин лемсэ «Этно-кудонь» прявтось П.В. Рябов ды те музейсэнть важодицясь Р.В. Водясова, эрзянь содавикс сёрмадыцясь Нуянь Видяз ды Р.Д. Жегалина, кона пачколесь вастовомантень мик Игнатбуестэ.

DSC_0848.JPG

Людмила Рябова – МР-нь Прявтонь (2005) ды И.П.Кривошеев лемсэ (2008) литературань премиятнень лауреат, «Рождественская звезда 2007» республикань творческой конкурсонь дипломант. 2013 иестэ саезь – Россиянь Сёрмадыцянь вейсэндявкссо.

– Людмила, ёвтак зярояк валт семиядот.

– Мирдем Андрей эсенек велень. Софья тейтеренек тонавтни 3-це классо. Аштян мельспаросо, сон пек вечксы эрзянь келенть, корты эйсэнзэ ды бажи содамонзо седе домкасто. Кеман, ошонь школатнесэ седе товгак кармить тонавтневеме эрзянь ды мокшонь кельтне. Те пек эряви минек раськетнень туртов. Берянь, мекс зярс а весе тень чарькодить.

 

Татьяна Маторкина

Рассказать друзьям