Новая выставка и новые работы от Рябова Н.В.
Январень 14 чистэ С.Д.Эрьзянь лемсэ республикань изобразительной искусствань музейсэ панжовсь «Мотив, образ – вдохновение» Николай Рябовонь выставказо. Николай Владимирович – Мордовия Республикань заслуженной художник, Н.П.Огарёв лемсэ МГУ-нь национальной культурань институтонь эрзянь-мокшонь традиционной культурань ды неень шкань искусствань кафедрань профессор. Чачсь сон 1958 иестэ Кочкурбуень Вирь ало Тавла велесэ. 1977 иестэ прядызе С.М.Киров лемсэ Ицялонь педагогической училищанть, 1989 иестэ – Н.К.Крупскаянь лемсэ Московонь государственной педагогической институтонть. 1996 иестэ саезь Россиянь художникень Союзонь член. Н.В.Рябовонь важодеманзо невтевсть республикань, регионъютконь, весероссиянь, раськеютконь эрьва кодамо выставкасо.
Те выставкасонть невтевить артыцянть живописень ды декоративно-прикладной искусствань 48 произведениянзо. Авторось сынст лангсо важодсь тедеде ды меельце иетнень перть.
Н.В.Рябовонь картинатнесэ невтевить Тавла велень эрицятне, сынст эрямось, кенярксчитнень тешкстамось. Башка эряви явомс покштятнень-бабатнень койтнень-кирдатнень невтеманть. Кецявтыть сельме пейзажтнэ. Сеске редяви, авторось пек вечксы тиринь ёнксонзо. Кода тешкстазель, сон а пели вейке картинасо невтемс ламо ломанень образт. Те аволь шожда.
Выставканть панжомо сакшность артыцянть малавиксэнзэ, ялганзо, содавиксэнзэ ды, нама, студентэнзэ, конат тешкстызь, Николай Владимирович – паро тонавтыця, видечинь вечкиця, превс путыця.