Караоке на родном языке. Тиринь кельсэ.
Равчирень финнэнь-угрань раськень культурань центрась совавтсь эрямос од проект. Те – «Эрзякс-мокшокс караоке». Сонзэ прявт бажамось – содавтомс республикань эрицятнень тиринь моротнень марто. Истя, лембе вастовома ютась ошонь вейке ресторансо. Тей тердевсть весе сетне, кить вечкить морамо. Чокшнесь алтавсь эрзянь ды мокшонь моротненень.
Кенярксчинть панжизе Равчирень финнэнь-угрань раськень культурань куншкакуронь прявтось Р.И.Акашкина. Сон пачтясь, истямо проектэсь – васенце. Тиринь моротнень эрявить ванстомс, лездамс тенст а ёмамс. Весе кемемась од ломантнень лангс. Эряви седе сеедьстэ вастневемс, морсемс. Эрзякс ды мокшокс морамонь вастовоматнень арсеви ютавтомс ковозонзо весть. Теке жо таркасонть ули мель тейнемс этнокиштематненьгак. Ресторанонь вейке нупалесь артозь-теезь раськень стильсэ. Тесэ пек лади ютавтомс самай истят вастовомат. Равчирень центрась жо бажи тевс нолдамс ламо эрьва кодат лия проектткак.
Вастовоманть ветясь «Мерема» фольклорной ансамблянь прявтось Екатерина Модина. Тесэ меревсь эрьвантень морамс вечкевикс моротнень. Паро, зярыя иеде икеле лиссь «Караоке по-мордовски» дискесь, ков совасть минек артисттнэнь эрзянь ды мокшонь народной, неень шкань моротне.
Теде башка, чокшнесэнть ульнесть пелькстамот ды налксемат. Морамо сакшнось МР-нь Заслуженной артисткась Любовь Князькова. Истя жо весень седеест эждинзе Саранскоень музыкальной училищань тонавтницясь Артём Мамаев. Бути карми эштё истямо кенярксчи – моледе тыньгак, илядо визде!
Татьяна Маторкина
Фототне Э.Ретунскоень