Новости на эрзянском языке
4001
Новости на эрзянском языке

"Гайги вайгель"(Звонкий голос) звучит на всю страну

Ансамбль "Гайги вайгель"

Народный фольклорный ансамбль «Гайги вайгель» села Новая Пырма Кочкуровского района Республики Мордовия известен далеко за пределами республики. Он обладатель высокого звания «Лауреат Государственной премии Республики Мордовия», многократный лауреат и дипломант международных, всероссийских, республиканских и районных конкурсов и фестивалей. В 2014 году приказом Министерства Культуры Российской Федерации за высокие достижения в сохранении и развитии народного художественного творчества и традиционной культуры народов России ансамблю «Гайги вайгель» присвоено звание «Заслуженный коллектив народного творчества».

    

Творческой коллективтнень ютксто свал явови се, конась морамосонзо токши ломанень ойме, кецявты кунсолыцятнень. Минек республикасо ламо ансамблят. Эрьванть  эсензэ репертуарозо, косо улить кезэрень морот. Ламо вайгельсэ морамось киньгак а кады мельтеме. Седеяк пек сетнень, кить эрить республикань томбале.

Кочкурбуень Од Пурня велесэ ули «Гайги вайгель» народной фольклорной ансамбля. Сонтемензэ Мордовиясо а юты вейкеяк покшчи. Коллективесь морси кода эсензэ районсо, истя жо республикань покш сцена лангсо, ардтни лия регионовгак. Те ансамблясонть эрьва кодамо профессиянь ломанть, иесткак, видьстэ меремс, аволь аламо. Ансяк весень сынст вейсэнди вейкесь – эрзянь моронтень певтеме вечкемась. «Гайги вайгелесь» – Мордовия Республикань Государственной премиянь лауреат, раськеютконь, весероссиянь, республикань, райононь эрьва кодамо конкурсонь ды фестивалень лауреат ды дипломант.

Те коллективесь пурназель 1953 иестэ. Васенце составонть эйстэ тосо морсить ансяк кавто ломанть. Сынь ледстнить, кода 1970 иестэ ардтнесть Московов «Мелодия» звукозаписывающей студияв, косо грампластинкас сёрмадозельть сынст морост. Ансамблясонть моронь ушодыцякс ульнесь  Прасковья Кузьминична Крамойкина. Коллективсэнть а ёвтавишка путовксост Дарья Леонтьевна Антошкинань, Фёкла Ефимовна Мокейкинань. Сынсь стасть эрзянь оршамопельть, кочкасть репертуар, ледстнесть-вельмевтсть стувтозь седикелень койтнень. Весе юткошкаст алтасть вечкевикс тевентень. Ансамблясь курок теевсь райононь визитной карточкакс.

70-це иетнестэ ансамблянь ветицякс ульнесь Р.С.Зорькина. Сон парсте содасынзе эрзянь моротнень, койтнень-кирдатнень. Мельспаросо морсесь аватнень марто велень эрицятнень икеле. (Ней Раиса Сергеевна морси «Ламзурь» ансамблясо).

1983 иестэ саезь Од Пурнянь авань коллективенть кармась ветямо Мария Дмитриевна Бояркина. Самай сестэ кочказель ансамблянть туртов виев лемеськак – «Гайги вайгель». Сон кармась эрсеме республикань культурань весе мероприятиятнесэ. Ды аволь стяко шкань ютазь ансамблянть туртов максозель народной коллективень покш лемесь.

«Гайги вайгеленть» репертуарсо эрзянь кезэрень морот, рузонь народной морот, частушкат, содавикс сказительницанть Серафима Люлякинань моронзо. Морыцятнень валост коряс, кезэрень моротнень сынь тонавтнесть бабаст-сырькаест пельде. Народной моротне ютасть вейкеде-вейкес. Сынст свал морсесть весе кенярксчитнесэ, косо весе велесь пурнавиль вейс.

Ансамблясь вельмевтизе «Эрзянь свадьба» коенть. Тосо улить башка морот, конатнень морсильть ансяк урьвакстомсто, кодат валт эряви ёвтамс, кона шкане авардемс, лисемс киштеме ды седе тов.

Коллективень аватне кедьчелькевть. Сынь аволь ансяк эстест стасть костюмт, истя жо райононь лия ансамблятнень туртовгак.

2007 иестэ «Гайги вайгель» ансамблясь тердезель Санкт-Петербургов «Рождество Христово» Россиянь православной фольклорной фестивалентень. Тосо минек морыцятне невтизь «Эрзянь свадьбанть», Роштовань калядамотнень. Теде мейле ульнесть Казанень «Крутушка» Раськеютконь фестивальсэ.

2013 иестэ народной фольклорной ансамблясь якась Чебоксары ошов  «Весе минь – Россия» Весероссиянь народной творчествань фестивалев. Тосо сынь лиссть I степенень лауреатокс.


Шумбрат Финно-угрия 2012. Владимир Владимирович Путин и Гайги вайгель. Фото Эдуарда Ретунского.

Фото Эдуарда Ретунского.

Башка валт эряви ёвтамс, кода аватне вастневсть минек ды омбо масторонь покш ломантнень марто. 2007 иестэ Саранскойсэ ютась «Шумбрат, Финно-Угрия!» финнэнь-угрань раськень Масторлангонь I фестивалесь. Те кенярксчинтень сакшность РФ-нь Президентэсь В.В.Путин, Финляндиянь Президентэсь Т.Халонен ды Венгриянь Премьер-министрась Ф.Дьюрчань. Омбоцеде минек аватне В.В.Путинэнь вастызь 2012 иестэ, зярдо келейстэ тешкставсть эрзянь ды мокшонь раськенть Россиянь государствань лия раськетнень марто вейсэндявомань тёжа иетне. Россиянь Президентэсь кадсь коллективенть туртов автограф. Неть вастовоматнестэ кадовсть ламо фотографият.

Теде мейле «Гайги вайгелесь» Оперань ды балетэнь театрасо вастсь Франциянь содавикс киноактёронть Жерар Депардьень. Эрзянь аватне тусть васолдонь инженть мельс. А кода эно?! Вайгелест оно кодат виевть, паляст лангсто сельметькак а саевить. Сынсь чаразь чарыть Жераронь перька, казсть тензэ эрзянь панар ды эрзя-мокшонь паспорт.

2012 иестэ Од Пурня велев сакшность Московонь инжеть. «МИР» телеканалось «Гайги вайгель» ансамблядонть снимась документальной фильма. Эрьва морыцянть аволь шожда эрямодо ёвтнесть башка, якасть тенст кудос, невтизь, кода эрить. Истя жо невтизь репетицияст, конат ютыть велень клубсо. Вейке-вейкенень лездазь, бабинетне састыне кузить сцена лангс ды ушодыть моро. Сынст валост коряс, зярдо морыть – стувтовить весе мелявкстнэ, апаротне ды орматне. Малав весе эрить ськамост, мирдетне кулость, эйкакштне сралесть масторонь келес. Печтямс ризксэв ськамочинть лездыть моротне, концерттнэ. Фильмась лиссь пек мельстуиця! Сон ули Интернетсэяк, косо ванызь 14 тёжадо ламо ломанть!

Гайги вайгель. Фото Эдуарда Ретунского.

Фото Эдуарда Ретунского.

Неень шкане ансамблясонть морсить 10 морыцят: Роза Степановна Агеева, Прасковья Николаевна Фролкина, Евдокия Герасимовна Адмайкина, Мария Никитична Адмайкина, Мария Петровна Ведяйкина, Раиса Алексеевна Устинова, Вера Николаевна Лазуткина, Нина Фёдоровна Адмайкина, Валентина Фёдоровна Потанина, Мария Дмитриевна Бояркина. 2003 иестэ саезь ансамблянь аккомпаниаторокс кармась Иван Ильич Фролкин, вейке морсицянть мирдезэ. Весе сынь топавтыть ине тев – ванстыть минек покштянок-бабанок пельде ютазь кезэрень моротнень. Сынст репертуарсо малав 40 раськень кезэрень морот. Бути сави тенк неемс кодамояк концертсэ «Гайги вайгеленть» – цяпадо тенст псистэ. Лембе вастомась пек кецявты сыре морыцятнень. Кемень-комсь иень ютазь минь, паряк, а марясынекак алкуксонь, ламо вайгельсэ морамонть.

 


 

Татьяна Маторкина

Рассказать друзьям