Новости на эрзянском языке
597
Новости на эрзянском языке

Эрзятне таго Якубовичень кедьсэ

Поле чудес с эрзянами


«Поле чудес» телепередачасо аволь весть савкшнось неемс эрзянь ломанть. Тосо ульнесть Самара ёнксонь эйкакшонь кавто ансамблят, Ульяновск областень Виктор Овчинников композиторось нинзэ марто, Нижней ёнксонь Лукояновань эрзятне, Московонь «Ойме» ансамблясь, эсенек «Торама» фольклорной коллективесь. Ютазь пецясто Якубовичень кедьсэ таго гайгсть эрзянь морот.

Налксицятнень ютксо ульнесь Сергей Степанович Сонаев. Сон яволявтсь, сась тей эрзя раськенть пельде. Мерсь, келя, умок ваны те мельстуиця передачанть. Покш мелезэль понгомс. Коень коряс, анокстась казнеть. «Леонид Аркадьевич, монь койсэ, тонеть умок эзть казекшне карть. Арсян, весе лиятне таштомсть. Кирдть одт!» – истя ушодсь минек инжесь. Теде башка сон казсь Мордовиянь флаг марто галстук, раськень тешкс марто бейсболка ды калт.

Санаев Сергей

Сергей Степановичень валонзо коряс, передачань теицятне ламо мезе киртясть. Невтезель, нама, моронь казнесь. Сергей нинзэ Надежда марто морызь «Эх, эрзянка» содавикс моронть (сонзэ авторось Татарстанонь В.П.Кирдянов). Ваныцятне, нама, эзть чарькоде, ансяк весе мизолдсь ды цяпасть паро мельсэ.

Данилкина Надежда

С.С.Сонаев чачсь Покш Игнатбуень Игнатвелесэ. Ламо иеть служась Камчаткасо, ней – военной пенсионер. Эсь шкасто тонавтнесь музыкальной школасо, седи ды морси. Сынст семиясо весе моронь вечкицят. Ламо иень перть сцена лангсо морсесть тетяст-аваст, конат ней уш арасть. Алексей Сонаев покш цёраст – баянист, Ирина Эрзяйкина сазорост – виев морыця, средней братоськак морси.

Фольклорный ансамбль

Сергей Степанович нинзэ Надянь марто морсить ды раськень тевть теить «Эрзянь вайгель» Московонь куросонть. «Кемтядо, ансяк Московсо эрязь, чарькодинь, кодат минек моротне!» – ёвтни Сонаев. Маласо шкасто сынь нинзэ марто сыть Кочкурбуень Якстере Зорька велев, тосо эрьва ие Троицянень тейнить концерт. Теде мейле июлень 9 чистэ – Раськень озксов, тов сыть морамо весе «Эрзянь вайгель» ансамблянек.

Татьяна Маторкина

Рассказать друзьям