Елена Александровна Великановань сеедьстэ савкшны некшнемс эйкакшонзо марто театрасо, музейсэ ды лия покш кенярксчисэ. Теке тиринь ава, ветни эйдетнень эрьва кува, ёвтни тенст, тонавты. Сон 30-де ламо иеть важоди Луховкань средней школасо тонавтыцякс. 2015 иень, Тонавтыцянь чистэнть Елена Александровна казезель «Мордовия Республикань заслуженной учитель» покш лемсэнть. Те – ламо иень перть эйкакштнень вадрясто тонавтомаст кисэ. Ансяк сонсь соды, зяро эйкакшт ютасть кедьганзо, зяронь тонавтсь ды путсь превс. Авась важоди начальной классонь тонавтыцякс. Сонензэ сыть эйдень кужонь прядомадо мейле, сехте вишкинетне.

Е.А.Великанова чачсь Орданьбуе ёнксонь Ежовка вишка велинесэ. Течи тосо эрить ансяк зяро-бути ломанть. Тетязо, Леонтьев Александр Иванович, эрзя, – велень хозяйствань специалист, авазо, Валентина Осиповна, начальной классонь тонавтыцяль (аволь умок сынь тешкстызь вейсэнь эрямонь 50 иетнень). Еленадо башка семиясонть ули ялаксозо Сергей.

1971 иестэ Елена Александровна 1-це классов сыргась тонавтнеме Покш Игнатбуень Новобаевской школав. 1975 иестэ Леонтьевтнень семияст сась эрямо Саранск ошонть вакссо Луховка посёлкав. Тесэ Елена Александровна сырнень медаль марто прядызе средней школанть. Теке жо иестэнть мольсь тонавтнеме М.Е.Евсевьевень лемсэ МГПИ-нь начальной классонь факультетэв. Нама, кода школасояк, пединститутсо сон тонавтнесь парсте ды прядызе якстере диплом марто. Мекс кочкизе тонавтыцянь тевенть? Паряк, вансь аванзо лангс, кона тонавтыцяль, мельс тукшнось тензэ максомс содамочить вишкинетненень. Истя, 1985 иестэ Елена ушодсь важодеме Луховкань средней школасо начальной классонь тонавтыцякс. Теке таркасонть, теке должностьсэнть сон важоди нейгак.

– Малав комсь иеть минь авань марто важодинек вейсэ, сон тонавтсь шабра классонть. Васень шкасто лездась монень эрьва мейсэ. Паряк, секс мон стакачи эзинь маря. Ней авам пенсиясо. Монь важодемань книжкасон ансяк вейке тешкс – Луховкань школав важодеме саемадон, – ёвтни Елена Александровна.

Е.А.Великанова тонавты эйдетнень ловомо, ловномо ды сёрмадомо. Сонзэ эйсэ мельспаросо кунсолыть весе эйкакштне. Тонавтыцясь максы весе седей лембензэ вишкинетнень туртов. Корты мартост чевтестэ, вайгелень апак кепеде. Маряви, сон муи кель-вал эрьванть марто. Бути мезесь а чарькодеви, тагояк толковасы-ёвтнесы. Елена Александровна истя жо вети эрзянь кель 2-4-це класстнэсэ.

Тонавтыцясь эйкакшонзо марто свал яви мель эрьва кодамо пелькстамотнес ды конкурстнэс, косо сеедьстэ лиснить изницякс. Нама, олимпиадатнесэяк. Теде башка, Е.А.Великанова тевс нолды исследовательской важодеманть. Эрьва ие тонавтницянзо лиснить изницякс «Кенгуру», «Русский медвежонок»,  «ЧИП», «Школьники – науке ХХI века» весероссиянь пелькстамотнесэ.

Сонзэ классо теевсь паро коекс пурнамс вастовомат содавикс ломантнень марто (писательть, поэтт, Ине Отечественной войнань ветерант, МЧС-нь важодицят ды седе тов). Елена Александровна свал сайни эйкакшонзо выставкав, театрав, музеев, ютавтни эрьва кодат экскурсият, творческой конкурст. Макаровкань Иоанно-Богословской монастыренть ды тетятнень-аватнень марто ардтнить паломникень экскурсиява.

Елена Александровнань тонавтницянзо зярдояк а аштить тевтеме. Весе сынь яксить спортонь, музыкань ды художественной секциятнес, кружоков. Течи сонзэ классо 29 эйкакшт.

– Весе монь эйдетне кунсолыцят, парсте тонавтницят. Уроктнеде башка, мельспаросо якатано театрав ды экскурсияв, – корты Елена Александровна. Сонзэ валонзо коряс, теемс сень, мезе вечкат – олячи, вечкемс сень, мезе теят – уцяска.

Е.А.Великанова вадря важодеманзо кисэ тешкстазель аволь весть. 2006 иестэ сонензэ максовсь РФ-нь Президентэнь грант («Образование» НПО-нь коряс Россиянь сехте вадря тонавтыцянь конкурсонь изниця). 2013 иестэ казезь Саранск ошонь Администрациянь прявтонь грантсо. Теке жо иестэнть невтизе прянзо «Иень тонавтыця» ошонь конкурссонть, косо лиссь лауреатокс «Сердце отдаю детям» номинациясонть. 2014 иестэ Елена Александровна лиссь изницякс республикань тонавтыцятнень ютксо, сон казевсь МР-нь Прявтонть Грантсо. 1999 иестэ саезь – начальной классонь тонавтыцянь квалификационной высшей категориязо. 2006 иестэ саезь – «РФ-нь народной образованиянь почётной роботник», Трудонь ветеран. Ды вана аволь умок казезель «Мордовия Республикань заслуженной учитель» лемсэнть. Те аволь стяко. Те – парсте важодеманть, тевенть вадрясто топавтоманть кисэ. Койсэнь, весе содасынек, кодамо аволь шожда тонавтыцянь профессиясь.

Елена Александровна свал паро мельсэ якси тонавтыцянь конференциятнес, а пели невтемс прянзо учителень пелькстамотнесэ, Интернет-конкурстнэсэ, якси ёрокчинь кастомань курсатнес. Эрьва иестэ ардтни «Первое сентября» издательской кудонть юрсо ютавтовиця Московонь педагогической марафонов. Ули эсензэ сайтозо.

Школань тевтнеде башка сонзэ ули вечкевикс семиязо, конанень истя жо муи шка. Мирдензэ, Сергей Ивановичень марто кавто эйкакшост. Сынь аштить кувалмаст мельспаросо ды каштанчисэ. Андрей цёраст прядызе Н.П.Огарёв лемсэ МГУ-нть, Дарья тейтерест тонавтни Санкт-Петербургонь Театральной искусствань академиясо. Весе ютко шканзо Елена Александровна алты сыненст. Сон истя жо вечки ловномо, яксеме театрав спектаклянь ваномо, концертэв. Эйкакшпингстэ саезь яви мель фотографиянтень. Васенце фотоаппаратозо ульнесь «ФЭД-5», мейле – «Зенит». Нейгак ули неень шкань фотоаппаратозо. Сонзэ фотографиянзо аволь весть лиснесть изницякс натой весероссиянь фотоконкурстнэсэ. 2001 иестэ вейке фотозо лиссь «Начальная школа» профессиональной журналонь васенце лопасо.

Вана истят тонавтыцят эрявить минек школатнес. Эдь эйкакштненень сынь максыть ламо содамочить, превть, кастыть эйсэст тиринь масторонь вечкицякс, алкуксонь ломанекс.

Татьяна Маторкина