Новости на эрзянском языке
873
Новости на эрзянском языке

Андрей Ромашкин: «Эрьва чи ледстнян тетядон…»

6 сентября 2016 года, 65 лет со дня рождения известного фольклориста, музыканта, кинодокументалиста, создателя фольклорно-этнографического ансамбля «Торама» Владимира Ивановича Ромашкина.

Сегодня, 6 сентября 2016 года, 65 лет со дня рождения известного фольклориста, музыканта, кинодокументалиста, создателя фольклорно-этнографического ансамбля «Торама» Владимира Ивановича Ромашкина. Его нет с нам уже 14 лет… Каким он был, как жил? Об этом рассказывает его сын Андрей Ромашкин.

 

Сентябрянь 6-це чистэ содавикс фольклористэнтень, музыкантонтень, кинодокументалистэнтень, «Торама» фольклорно-этнографической ансамблянь пурныцянтень-теицянтень Владимир Иванович Ромашкиннэнь топодевельть бу 65 иеть. Тедеде топодить 14 иеть, кода сон арась ютксонок. Те интервьюсонть сонзэ цёразо Андрей ёвтни минек туртов тетядонзо: кодамо сон ульнесь, мезде мелявтсь ды кода эрясь.

6 сентября 2016 года, 65 лет со дня рождения известного фольклориста, музыканта, кинодокументалиста, создателя фольклорно-этнографического ансамбля «Торама» Владимира Ивановича Ромашкина.  

– Андрей, кодамокс кадовсь тонь ледстнемасо тетят?

– Тетям эрямонзо перть ульнесь пек валдо ломанекс. Сон муиль кель-вал эрьванть марто. Сценась сонзэ туртов ульнесь истямо таркакс, косо паро мельсэ кортнесь весень марто. Сон маштсь кортамо. Эйсэнзэ парсте кунсолость, кодамо покш илязо уле залось. Лиясто, паряк, ёвтыль стяконь валт, сонензэ ялатеке кемильть. Монь эйсэ истямо арась. Сонзэ весе те мольсь ойместэ. Тетям вечкилизе эрямонть, пертьпельксэнть. Мон тонавтнинь васенце классо, зярдо сон рамась Вирь ало Тавласто кудо. Кода сон вечксь озямо пиресэ! Свал бажась видемс од видьмекст, тейнесь мартост эрьва кодат «экспериментт». Ялгатне кучность тензэ видьмекст натой Финляндиясто! Эмежензэ касыльть покшт, минь натой абунгалинек. Сеедьстэ тетям сайнилимизь мартонзо вирев пангс. Мон те шкас яксян пангс секе таркатнева, кува якилинек сонзэ марто. Тетянь ульнесь коезэ – зярдо совиль вирьс, каилизе кепканзо ды сюкониль Вирявантень. Сон алтыль парсте ветямс прянть, энялдсь лездамс а ёмавтомс кинть, а кадовомс. Монгак ней свал истя тейнян. Сюконян Вирявантень. Те коесь кеместэ совась монь седейс.

Те шкас ледстнян: тетям мернесь, Тавласо минек рамазь кудосонть икелев эрясь Вирява. Паряк, сон истямо ёвкс тенек ёвтнесь, ансяк минь кеминек. Каштомонок лангсо ульнесть ламо-ламо пештеть. Сынь покшольть, ансяк чавольть – коськсть куватьс аштемадонть. Мон кевкстнинь, мекс сынь чавот? Тетям каршон: «Вирявась седе ламо эри вирьсэ, тей кандсы пештетнень ды мекев туи вирень ванстомо». Нейгак сонзэ валтнэнь кирдян мельсэ. Кеман, ули Вирява. Бути сырган вирев ялгатнень марто, кармавтан, ломанькс ветямс прянть, а ёртнемс мезтькак. Лиясто, пурнан тосто суликатнень ды пакеттнэнь. Сон тонавтсь эйсэнек вечкемс пертьпельксэнть, вечкемс ломантнень.

6 сентября 2016 года, 65 лет со дня рождения известного фольклориста, музыканта, кинодокументалиста, создателя фольклорно-этнографического ансамбля «Торама» Владимира Ивановича Ромашкина.

Тетям ёвтниль, кода 1990-це стака иетнестэ савкшнось вешнемс лездыцят-спонсорт, вешемс ансамблянтень килангс ярмакт. Сон ёвтниль: «Сован прявттнэнень, ломантне учить эсь очередэст. Ванан, весень чамаст нусманят, весе аштить мелявкс потсо. Эрьвась тей сась эсензэ стакачинзэ марто. Мезе теемс? Мон тенст мерян: мекс истя прянк нолдынк? Эрьга, ёвтнян тенк од анекдот!». Ды ушодыль ёвтнеме кодамояк ташто анекдот. Паряк, кияк пек эзь пейдеяк, ансяк чаматнесэ ульнесть мизолкст. Ванат, ломантне эсь ютковаст кортазевсть. Сон казиль оймень лембензэ лиятненень. Те парсте редявсь, зярдо сон кортыль ломантнень марто сцена лангсто. Тетям содась минек раськеденть ламо былинат, легендат, небылицат. Вадрясто маштсь сынст ёвтнеме, косо пейдезь, косо тонавтозь ладсо. Истямо мельспароль кунсоломс!

Тетям эйкакшпингстэ саезь содавтымизь культурно-музыкальной эрямонть марто. Зярдо важодсь культпросветучилищасо, лелянь марто сайнилимизь мартонзо тов. Оймсема читнестэ тосо кияк арасель. Минь тонавтнинек морот, морынек, сединек. А ледстявияк, зяро иесэ карминек морсеме концертсэ. Кудосояк морылинек кезэрень морот. Сон тонавтсь эйсэнек морамо. Морынек колмо вайгельсэ, эрьвась эсензэ лувсо. Зярдо пурнавсь «Торамась», минь Виталий лелянь ды тетянь студенттнэнь марто карминек тосо морамо. Мон прядынь скрипкань, Виталий – фортепианонь коряс музыкальной школа.

– «Торамась» сеть шкатнестэ сеедьстэ ардтнесь концерт марто омбо масторов. Кода ютасть неть ардтнематне?

– Истя. Зярдояк тень а стувтови, кода ардтнинек концерт марто Англияв, Швецияв, Эстонияв, Финляндияв. Тетям тосояк мусь спонсорт. Швециясо лия музыкальной коллективтнень ютксто саинек васенце тарка! Тосо невтинек кулозень кувалт лайшема-авардема коенть. Ваныцятне истя ёжомарязь кунсолость, натой эзть цяпаяк. 1994-це иестэ ульнинек «Голоса России» Весероссиянь омбоце телерадиоконкурссо. Тосояк саинек 1-це тарка.

Лия ошка концерт марто ардтнемстэ тетям свал мелявтсь: ансяк сатовольть ярмактне, улест весе андозь. Эрявсь пурнамс эрьва кодат документт. Тетям свал кирдсь аламошка башка ярмакт (паз илязо мере понгомс кодамояк зыянс омбо масторсо!). Коллективсэнть теньсэ сонензэ лездасть. Ульнесь ломань, конань кедьсэ ванстовсть вейсэнь ярмактне, билеттнэ, чектне. Сехте стакась – муемс ярмакт, сыргамс тестэ ды ютамс границянть томбалев.

«Тораманть» коряс сон пек ризнэсь. Ламо шкань перть коллективенть арасель «кудозо», а косоль пурнавомс, ютавтомс репетицият, эзть пандо зарплата. Весе те изнявсь сонзэ виев обуцянзо вельде. А потамс удалов, молемс ансяк икелев.

Тетям эзь аште ве таркасо. Сонзэ мельс-превс свал сыль мезеяк од. Тетям бажась аволь ансяк раськень седямотнень коряс ламо вайгельсэ морамо – сон варчнесь лия форматт. Бажась муемс ламо ваныцят, кецявтомс ды дивавтомс сынст. Нолдась тевс компьютерэнь аранжировкат. Важодсь тень коряс С.Н.Каштанов, С.А.Киселёв марто. Мейле теевсь содавиксэкс Александр Куринэнь марто. Варчась вейсэндямс фольклоронть ды джазонть. Проектэсь лемдязель «Торама-джаз». Дискенть сёрмадынек уш тетянь куломадонзо мейле Эстониясо, ансяк сон кадовсь апак нолда. Материалось пурназь вадря.

– Кодамо мель явсь Владимир Иванович эрзянь келентень? Ламот содыть, тынкак, эйкакшонзо тонавтынзе келентень.

– Малав весе содыть: эрзянь кельсэ тетям ушодсь кортамо, зярдо чалгась 30 иетнень трокс. Сон икелеяк чарькодсь келенть, ансяк эзь кортне. Весе те витевсь, зярдо сон Н.И.Бояркинэнь марто пурнась велетнева фольклор. Сыре ломантнень марто кортнемстэ эрявсь муемс вейсэнь кель-вал. Сонензэ савсь кортамс сырькайтнень марто эрзякс. Истя, аламонь-аламонь тонадсь. Тетям свал ледстниль, кода якасть велетнева. Весть лоткасть вензэ лангс вейке бабиненень, конань кияксозояк арасель! Тарказонзо – мода лангс каязь мень-бути лазт.

Кудосо тетям ушодсь тонавтомо келентень минекак. Аволь вийсэ кармавтсь, апак сёвно. Сон свал мезтькак ёжовсто арсесь. Саемга, «Тонавтат сядо валт – максан теть сядошка целковойть!». Минь покш мельсэ тонавтнинек. Мон карминь сёрмадомо-пурнамо тетрадьс сеть валтнэнь, конатнень содасынь. Истя састыне кортазевинек эрзякс. Авадон башка кудосо весе кортынек эрзякс. Тетям мериль, рузкс тынь школасояк пешкедемазонк кортатадо. Велесэ улемстэяк, концерттнэсэяк кортынек эрзякс. Ды те виде. Неень шкане эрзянь келесь монень пек малавикс. Кадык аволь педе-пес содаса, ялатеке лован эйсэнзэ тиринь келекс. Тамашань тев, зярдо кавто эрзят кортыть рузкс. Весемесь ушодови кудосо, семиясто. Те покш зыян, зярдо эрзянь тетятне-аватне кортыть эйкашост марто рузкс. «Торамасояк» морсекшнесть эрьва кодамо раськень ломанть, кадык келенть а содылизь, ансяк моротнень смустест тенст ёвтылинек.

– Андрей, кодамо ульнесь тетят кудосо, семиясо?

– Кудосо эрьва чокшне тетям явсь миненек шка. Зярыя часонь перть тонавтнинек морот, эсенек партиянок. Пек вечкилинек истят чокшнетнень. Тетям эзь шна телевизоронь ваноманть. Мериль: «Тынь мезе, раужо ящтикень уреть?». Тевтеме эзинек аште, сонзэ пряс свал сыль мезеяк паро ды лезэв! Ве шкасто ветнилимизь каратэнь секцияв. Сонськак зярдо-бути якиль истямос. Кизна свал ульнинек дачасо. Путнинек-озавтнинек покш пире. Эрьвась важодсь. 1990-це иетне стакальть. Сынст ледстнемс арась мелеськак… Тетям важодсь кавто-колмо таркава. А мезде ды а мезе лангс ульнесь рамамс… Ялатеке тетям вачодо аштеме эзимизь кадно. Сон а симиль, а таргиль.

– Андрей, чачонь-рунгонь коряс тон пек молят тетят ёнов…

– Ламот тешкстыть, минь тетянь марто пек мольтяно вейке-вейке ёнов. Те истя. Пароль оймень коряскак улемс сонзэ кондямокс. Тонавтнян. Бажан улемс чевте седей ломанекс, эрямонь вечкицякс, паронь арсицякс. Тетям миненек пек а сатны. Эрьва чи ледстнян эйсэнзэ. Оймесь стакалгады арсемадонть: сонзэ а велявтсак... Улевельгак вакссонок, паряк, весемесь улевель лиякс. А кемевияк: ютасть 14 иеть, кода сон тусь эрямосто. Теке мерят те ульнесь исяк.

Тетям эйсэнек васькавтсь. Сон свал кутморясь ды палсесь минек, кадык покшкеть ульнинек. Апак нара сакалонзояк вечкевсть, зярдо токильть чамаумаренек. Миненек сон макссь весе вечкеманзо, седей лембензэ. Кеман, монгак улян истямо жо вечкиця тетякс эсь цёрынень туртов.

 

Татьяна Маторкина

Рассказать друзьям