Новое от Тамары Барговой
1412
Новое от Тамары Барговой

Эрзянь цера

Косынкин Сергей

Келей лавтов, сэрей, шумбра, ёлганя, моли прянзо апак нолда – те эрзянь цёра, паро мараля! Аволь ёвкссто – эрямосто! Мельспаро истямонть лангс ваномс! А уш карматдеряй содамо, мезть машты тейнеме, кодат арсемат-тевть сыргавтни, кода эряскали эрьва мезень коряс, кода вечкезь-маштозь эри – натой кенярдозеват апак учонь мельспаронь вастомантень: улить ютксонок истят ломанть, паро эрзят!

Сергей Косынкин Паракина велестэ, Покш Березник ёнксонь. Сонензэ 45 иеть. Ули семиязо, вечкиця ды вечкевикс низэ, кавто эйкакшонзо. Цёранстэнь 27 иеть, эри Московсо, военной, тейтерьканстэнь кемень иеть – Сергей пек бажи – кадык тонавтни киштеме–морамо эрзянь лувсо-ладсо.

Косынкин Сергей

Минь Сергей марто вастовинек Лукояновань «Эрзянь лисьмапря» покшчисэнть. Ашо ацавкс лангсо сон сравтынзе эсензэ экспонатнэнь – кудоютконь седикелень инструментариянть. Тесэ стамескат, узереть, инзэдемат, цёканьсюрот, пеелюмат, тарвазт… - ламо мезе. Прок буто весе содавикс, ансяк-ансяк некшнинек неть кедьёнкстнэнь эсенек кудосо, тетянок кедьсэ… А вана уш шкась тусь-потась, ды ламось мезесь кармась стувтовомо, эрямостонтькак тусь. Монсь неинь, кода ламо цёра ломанть велить те ацавксонть икеле, ванкшныть, кевкстнить, кедьс сайнить те эли тона кедьёнксонть. –  Арсян, секень вант, эрьва ломаненть неть кедьёнкстнэнь марто сюлмавозь эсензэ ледстнеманзо.

Мон кевкстия Сергеень, кода истя сон сась те мелентень – пурнамс неть кедьёнкстнэнь.

Косынкин Сергей

- Неть кедьёнкстнэ кадовсть покштянь пельде, тетямгак важодсь оштё эйсэст, а ней уш тевтеме прок кадовсть, - ёвтни Сергей. - Мон сынст пурнынь паро таркас, карминь оштё пурнамо. Тынсь нетядо, ломантне бажить ваномс, кедьс саемс эрьва кедьёнксонть. Арсян, видестэ теинь, мекс ушодынь сынст ванстамост. Мон ней теян эсень музей.

Сергей Косынкин эсь мельсэ сакшны эрьва кодат ютавтневиця мероприятиятнес ды невтни-тонавты, кода керсемс пенгть, кода ледемс пеелюмасо тикше, кода сюлмсемс баня тенстть… Сон весе тень машты тееме истя, кода эсь шкасто тонавтызь эсензэ покштязо ды тетязо. Арси, паро, бути неень од ломантнеяк кармить маштомо весе неть тевтнень тееме.

Косынкин Сергей

Сергеень улить пек ламо лияяк тевензэ-арсеманзо. Истя, сон эсензэ сы шкань музеезэнзэ пурны эрьва кодамо шкань военноень оршамопельть. Кода пурнавсть экспонатнэ? – Кевкстни, вешни, сёрмали… Ломантне паро мельсэ максыть тензэ а эрявикс уш оршамотнень – кадык кие-бути куш сынст ванстасынзе невтемс сы шкань ломантнень туртов. Теде башка, Сергей прими участия поисковой тевтнесэ, яксесь походс лия поисковиктнень марто, примась участия «Сурский рубеж» военной налксематнесэ, эсензэ мельсэ ардтнесь Бородино таркантень, косо, кода содави, ютась Наполеон марто ине тюремась. Те весе -  а стяконь кис, ломанесь бажи содамс минек масторонь историянть эсензэ сельметнесэ неезь, эсензэ кедтнесэ-превтнесэ ванстазь.

Ули арсемазо путомс эсензэ таликанзо туризмань тевскак. Истя, аволь умок рамась кавто лодкат ды сонсь эйсэст уйневтни сетнень, кие тенень бажи, Сура лейганть. Лей чиресэ мейле сонсь пиди тенст штюрьбаяк, шашлыкак теи, бути карми туристтнэнь истямо мелест. Тияко, уемстэ, ёвтни тесэнь пертьпелькстэнть, кодат калт эрить ведьсэнть, кодат ракшат якить вирьганть… Икелепелень арсемасонзо стявтомс вирьсэ кудо ды якавтнемс туристтнэнь вирьга-кальга, кадык содасызь тиринь ёнксонь виртнень, касыця чувттнэнь-тикшетнень ды ракшатнень-маравтнэнь.

Вана истямо сон, Паракинасто эрзянь цёрась!

Тамара Баргова

Рассказать друзьям